Myndin varð tikin týskvøldið um ellivu tíðina. (Mynd Vagnur)

Týskvøldið var vakurt at hyggja suður Nólsoyarfjørð. Um ellivu tíðina týskvøldið tók eg omanfyri mynd. Klárt var í veðrinum, men kalt í luftini, tá sólin var farin handan sýnuna. Í Havn hava vit havt frálíkt veður í rúma tíð. Summarið í fjør var einki at reypa av, í hvørfall ikki í Havn. Kalt, vátt og lítil gróður. Minnist, at eg koyrdi til Viðarreiðis í fyrst juli mánað í fjør, eftir at mjørkin hevði fjalt Havnina í fýra, fimm vikur. Í Leirvík gingu børnini í stuttum buksum, og á Viðarreiði  arbeiddu tey lættklødd í bønum, urtagørðum ella málaðu hús. Øll vóru tey sólbrend. Læs resten →

Gongurólvur fekk oyðilagt róðurin á sundalagsstevnu. (Mynd Einar Martin)

Nú eri eg ikki nøkur ørn, tá ið talan er um kappingarreglur innan kappróður, men so mikið veit eg, at hongur bátur eftir í startinum, skal róðurin skjótast av. Hetta varð ikki gjørt á sundalagsstevnu, tá ið Gongurólvur hekk í fastur í startinum í tólv sekund sambært myndunum. Eg havi tosað við royndan dómara, sum sigur soleiðis: Sambært reglunum skal startur skjótast av, um báturin hongur eftir, so einfalt er tað. Eisini stendur í reglunum, at dómari kann skjóta róður av, áðrenn tjúgu sekund eru farin av róðrinum.  Læs resten →

Ormurin á sundalagsstevnu: F.v: Heri Thomsen, Robert Thomassen, Rúni Joensen, Petur í Gong, Dánjal Joensen, Geir á Lofti, Teitur Samuelsen, Bernt Jacobsen, Kári Rubek Nielsen og Hjalti Gunnarstein. Jonna Linda Christoffersen stýrdi. (Mynd Einar Martin)

Róðrarfelagið Knørrur heldur til í søguligum bygningi á Kongabrúnni. Í bygninginum standa trý 5-mannafør, tvey 6-mannafør, eitt 8-mannafar og eitt 10-mannafar. Eg havi spurt formannin Rúna Joensen, sum er gamal í garði innan rógving, hvussu hevur gingist at mannað bátarnar í summar. Formaðurin rør sjálvur við 10-mannafarinum, og hann sigur soleiðis um 10-mannafarið, sum er mannað við “eldri” rógvarum, sum allir hava róð áður: Læs resten →

Gleðiligt at síggja, at serliga Sølmundur kvinnur kundi geva Jarnbardi kapping. (Mynd Einar Martin)

Tvær vikur eru farnar síðani FM-róðrarnar á norðoyastevnu, og spenningurin hjá mær var, hvat manningar fáa burturúr tveimum venjingarvikum. Broytingar vóru á hóma á sundalagsstevnu, tó ikki so nógvar. Eg vónaði, at serliga dreingjabátarnir Jallurin og Frúgvin fóru at geva Fípuni Føgru og Bliki skarpan gang á sundalagsstevnu, men frástøðan í sekundum gjørdist fleiri. Gleðiligt var at síggja, at Jarnbardur 6-mannafar kvinnur veruliga fekk kapping serliga frá Sølmundi, og har kann gerasta spennandi næstu róðrarnar. Læs resten →

Mynd sum henda av Sea Shepherd skipi órógvar kanska føroyingin.

Sá í fjølmiðlunum í gjár grein, at kunningarstovnan á Sandi hevur leigað Sea Shepherd felagsskapinum hús, sum býráðslimur í Havn eigur. Eg stúrsaði við, tá ið eg las viðmerkingarnar frá fólki, sum skrivaði niðurgerandi viðmerkingar um býarslimin. Nú haldi eg, at fólk skulu taka seg saman, tí sambært fjølmiðlunum eru fólkini frá Sea Shepherd stak friðarliga. Sjálvandi skulu vit veita fólkunum sama blíðskap sum øðrum útlendingum, og besta vápnið hjá okkum er blíðskapur og upplýsing um grindadráp og okkara matmentan. Læs resten →

Hetta eru menninir, sum rógva við Vestmenningi. (Mynd Finnur Johannesen)

Tá ið eg sá myndina av Vestmenningi omanfyri á Facebook, ringdi eg til Finn Johannesen leiðara í VÍF kappróðri. Spurdi um myndin var gomul, ella um teir nú høvdu mannað Vestmenning. Finnur sigur soleiðis: – Myndin er nýggj, sum eg sjálvur havi tikið. Vestmenningur er mannaður, og ætlanin er, at báturin skal rógva á fjarðastevnu í Vestmanna 5. juli, á vestanstevunu 12. juli og á ólavsøku 28. juli. Men kanska vit síggja Vestmenning fyri fjarðastevnu. Eystanstevnan er jú 21. juni og jóansøkan 28. juni, sigur Finnur. Læs resten →

Arbeiðið at umvæla Ågot er umfatandi. (Mynd Vagnur)

Nógv var at hoyra um hendingina seinast í februar mánað , tá ið nótaskipið Slættaberg sigldi inn í síðuna á Ågot, sum lá við bryggu í Klaksvík. Skaðin var so mikið stórur, at vandi var fyri, at Ågot kundi søkka, og at fiskifarið gjørdist vrak og ikki kundi gerast aftur. Eg spáki mest sum dagliga á Vestaru bryggju og hvørja ferð fram við Ågot, sum stendur á minna sleipivogninum. Arbeiðið at umvæla fiskifarið er umfatandi, og hevði Slættaberg rakt Ågot eitt sindur longri afturi og skatt maskinrúmið, varð Ågot neyvan gjørd aftur. Eg havi prátað við leiðara á Mest um Ågot: Læs resten →

Olaf Vesturgarð hevur altíð dámað væl at íðka ítrótt og serliga at rógva um kapp. (Mynd Vagnur)

Fleiri fólk hava sagt mær, at nú er lætt hjá rógvarum, tí allar FM-manningar rógva 1000 metrar. Nógvar “mytur” eru um 1000 metra, 1500 metra og 2000 metra teinin, og tað at rógva við 10-mannafari, 8-mannafari og 6-mannafari við monnum. Hetta havi eg prátað við Olaf Vesturgarð um, sum hevur roynt alt av hesum, síðani hann byrjaði at rógva við Havnarbátinum í 1986. Eg havi sett Olafi tveir spurningar? Hvør er munurin at rógva við 10-mannafari, 8-mannafari og 6-mannafari, og hvør er munurin at rógva 1000 metrar, 1500 metrar og 2000 metrar. Olaf sigur soleiðis: Læs resten →

Sum á ólavsøku í havnargøtum fríggjakvøldið. (Mynd Vagnur)

Um níggjutíðina fríggjakvøldið spákaði eg mær gjøgnum miðbýin og oman á Bursatanga, har nøkur av abbabørnunum vóru. Havi ongantíð sæð so nógv fólk í býnum, telja vit ikki við á ólavsøku. Mest áhugaverda var, at so nógv foreldur við børnum vóru í býnum, og at eg sá hvørki lummafløsku, øl ella rúsaðan persón nakrastaðni. Niðri á Bursatanga stóðu abbabørn í langari bíðurøð, tí tey vildu sleppa at royna stigabilin hjá Brandstøðini, sum lyfti børnini langt upp í luftina, so tey sóu yvir allan býin. Læs resten →

Frálíkt at síggja menn frá Brimli kanna kappróðrarbátar, tí trygdin skal vera í lagi. (Mynd Vagnur)

Sjáldan havi eg myndatólið í bilinum, men í kvøld ætlaði eg at fáa samrøðu í lag við rógvara, men fekk ikki fatur. Fært tú ikki fyrstu søguna, er at taka næstu søguna. Úti Argjum lá bátar frá Brimli við bryggju og bíðaði, og eg fekk nøkur orð á báðar menninar, sum vóru við bátinum. Eg spurdi, um teir høvdu kannað nógvar kappróðrarbátar í summar. Teir søgdu, at vaktarskipini hava nógv at gera í løtuni, men er møguleikin til staðar, og teir eru nær landi, gera teir eitt legg við skjóttgangandi bátunum og kanna kappróðrarbátar. Vit fara at kanna fleiri bátar í næstum, søgdu teir. Læs resten →