Áhugaverd mynd við Landavegin í 1920. Stóru hvítu húsini til vinstru eru postmeistarahúsini. (Mynd Fornminnissavnið)

Myndin omanfyri er fyri meg ógvuliga áhugaverd, tí hetta er einasta heildarmynd av økinum við Landavegin, eg havi sæð frá gamlari tíð. Abbi og omma mín Christian og Sigrid Christiansen bygdu sær hús við Landavegin í 1901. Hugaligt at síggja grasfløturnar, har nú alt er bygt bæði sethús og nógvir almennir stovnar millum annað skúlar, fróðskaparsetur og heilsufrøðilig starvsstova. Eg havi prátað um myndina við mammu, sum er 98 ára gomul og er fødd við Landavegin. Hon býr á Ellisheiminum.  Læs resten →

Býlíðið í Havn í 1969. Frá vinstru: Eyðfinn Lamhauge, HB, Sólbjørn Mortensen, HB, Heri Nolsøe, HB, Jógvan “Egga” Jensen, HB, Tórstein Magnussen, B36, Hendrik Dahl, HB, Martin á Mýruni, HB, Tórur Holm, B36, Odmar Færø, B36, Ólavur Olsen og Dánjal Jákup Thomsen, HB. Dómaran Torbjørn Mikkelsen. (Mynd Fornminnissavnið

Síðan Føroyar komu upp í altjóða fótbólt, er nógv broytt. Eg minnist sum ungur, hvussu stórur áhugi var fyri býliðnum í Havn, tá liðið spældi ímóti hetlendingum, orknoyingum og øðrum liðnum, sum komu til Føroya. Myndin omanfyri er av býliðnum, sum 1969 spældi vinadyst ímóti hetlendingum í Gundadali. Sambært bókini Havnin – fólk og yrki var dysturin fyriskipaður í sambandi við, at peningur skuldi savnast inn til høllina á Nabb, sum hon tá æt. Læs resten →

Vælhýrd starvsfólk hjá Mest flota Tórsbátin. (Mynd Vagnur)

Altíð hugaligt at koma oman á Vestaru bryggju, tí myndin er ongantíð hin sama. Mánadagin í farnu viku sást hvítt 10-mannafar við drekastevni á Havnarvág og í Nólsoyarfirði, og mær vitandi stóðu allir FM-bátarnir hjá Havnar róðrarfelag í neystinum.

Hevði hoyrt, at starvsfólk hjá Mest høvdu spurt í felagnum at læna bát. FM-bátarnir verða vanliga ikki læntir út. Men í gamla neystinum, rópt Hornaneystið, stendur Tórsbáturin, næstnýggjasta 10-mannafarið, sum Sámal Hansen smíðaði felagnum á sinni. Gjørdist forvitin og dittaði mær at spyrja Mouritz Mohr, hvussu hetta átak hjá Mest er komið í lag. Og hann sigur. Læs resten →

Hesi tjøldrini sýntust ikki at reiðrast, men tað verður óívað fyrsta dagin. (Mynd Vagnur)

Leygarkvøldið koyrdi eg til Velbastaðar, setti bilin við ovara veg og spákaði í góðverðrinum oman á støðna. Har var blikastilli og dýrdarveður. Myndatólið hevði eg við mær, og tað er altíð spennandi at taka myndir, tí tú veitst ongantíð, hvussu úrtøkan verður. At taka myndir kann sammetast við at fara í fjørðin við snøri. Er nakar fiskur at fáa í dag, ella fara myndirnar at eydnast? Fegin ert tú, um myndirnar eydnast væl. Ikki eri eg nakar snillingur við myndatólinum, men av og á eydnast væl og aðrar tíðir minni væl. Torførast er at taka myndir úti sóldagar, tí ljósið er bjart, og við sólini koma skuggar a myndirnar. Leygarkvøldið var frálíkt myndaveður. (Skrivað12. august 2014) Læs resten →

Myndin er tikin eftir 1964. (Mynd Birgar Johannessen)

Frálíka myndina omanfyri, sum Birgar Johannessen, sáli, í 2014 legði út á Facebook, kunnu vit skriva nógvar reglur um. Myndin er tikin eftir 1964, tí nýggja Neistahúsið við uttandura hondbóltsvøllin varð tikið í nýtslu á sumri 1964. Vit síggja Mjørkadalsbarakkina, sum B36 keypti úr Mjørkadali, og sum varð bygd afturat B36 húsinum. Svørtu barakkirnar í Mjørkadali, sum arbeiðsmenninir búðu í, tá ið tey bygdu radarstøðina, vóru tiknar niður í 1963. Læs resten →

Hùsini ikki broytt á Vaglinum, tó var betong ikki lagt yvir ánna. Brandhylurin er har, og so hvíta runda girðingin, sum vit minnast. (Mynd Havnin – fólk og yrki)

Tá tú sært slíka mynd tikin niður á Vaglið, er ikki lætt at tíðarfesta myndina, tí í fyrsta umfari siga Apotekið, Gamli Bókhandil og Kommunuskúlin ikki tað stóra. Apotekið liðugt bygt í 1939 og tikið í nýtslu, so myndin er eldri enn 1939. Kommunuskúlin er frá 1895 og Bókhandilin, sum upprunaliga var millum – og realskúli, var vígdur í 1861. Dekk var lagt á Havnará frá Vaglinum oman Áarvegin fyrst í 1950-árunum, men so eru tað bilarnir. Við Kommunuskúlan frá 1895 ein Bedford M snið lastbilur, sum fyrstu ferð fór av verksmiðjuni í 1931.

Minnist sum smádrongur serliga fyrsta brandbilin í Føroyum ein Bedford M bilur, sum komu til Føroya í 1948, og Bedford líkbilin frá 1949. Hesir Bedford lastbilar vóru so líðandi broyttir og betraðir frá 1931. Fingu størru motor og fingu nýggjan stav aftrat Bedford navninum. Bedford K, M ella O. Áhugavert, at tey á brandstøðini hava varðveitt brandbilin frá 1948. Vit eldru minnast væl brandbilin, sum koyrdi seint og sýntist at ikki at trekkja nóg væl í brekkunum við allari útgerðini í bilinum. Myndin má vera frá miðskeiðis í 1940-árunum. (Vagnur)

Kundi verið hugaligt, at vit varðveittu læknahúsini og Perluna. Minni í Pisshúsini eru ikki nakað serlig, tí har var mangan skitið og óhumska. Hugaligt at síggja bátarnar og sandin. Har var bátadráttur, tá vit fyrstu ferð komu í Vágsbotn fyrst í 1950-árunum. (Myndin Havn -fólk og yrki)

Nógv áhugavert er at síggja á eldri myndum úr gomlu Havnini. Støðgaði við mynd úr Vágsbotni, sum er tikin umleið 1930. Har standa vøkur hús, har Sjómansheimið nú stendur, vit enn rópa húsini. Sjómansheimið stórur betong bygningur bygdur í 1951, tá neyðugt var at víðka um virksemið hjá Sjómansheiminum. Síggi, at gomlu húsini vóru rópt “Fysikuhúsini”, har fyrsti kommunulæknin í Havn Hilmar Fridricia virkaði. Hann var settur lækni í  1903.

Løgið at hugsa sær, at tey byrjaðu at taka niður vøkru húsini, sama árið, sum tú ert føddur. Annars minnast vit væl Perluna, Pisshúsið, húsini hjá einahandlinum, bátadráttin og gamla Kommunuskúlan. Áhugavert at síggja smíðaðu bátarnar, nú vit eru í glastrevjatíðini, har føroyskur báturin er sjáldsom mynd við sjóvarmálan. Vegur sæst ikki av Vaglinum oman í Vágsbotn ei heldur áin, sum rann av Vaglinum oman Mylnugøtu oman í Vágsbotn. Friðsælt á myndini at spáka í Vágsbotni. Eingir bilar. (Vagnur)

Longu í 1974 slóðu tey í Hósvík fyri nýggjum 6-mannafari. Hósvíkíngur vakurt 6-mannafar má sigast. (Mynd Hvannrók)

Tá eg sum smádrongur seinast í 1950-árunum kom fyrstu ferð í Álaker, átti Havnar róðrarfelag tríggjar bátar. Havnarbáturin og Ørvur stóðu í Hornaneystinum og Sílið undir hálvtaki skamt frá neystinum. Hyggur tú í hagtølini á Stavnur.fo og fer at leita eftir søguni um 6-mannaførini, gerst søgan ógvuliga áhugaverd. Og vit skulu fyrst aftur í 1970-árini

Fyri 1974 róðu vanliga eisini gomul 6-mannafør á stevnum, og nøvn sum Falkur úr Hósvík, Greivin av Signabø, Smiril og Fiskurin úr Vági og Mýlingur úr Hvalvík ganga aftur ár um ár. Men róðrarárið 1974 verður brotið upp úr nýggjum, tí nú rógva fyri fyrstu ferð tvey nýggj 6-mannafør. Hósvíkingur og Kollfirðingur, bátar, sum Nicals í Koltri smíðaði. Fekk hug at kannað søguna eitt sindur nærri. Havi eisini hitt Øssur Olsen úr Hósvík. Læs resten →

Málingahandilin byrjaði søluvirksemið í kjallaranum hjá Linu Arge: (Mynd Birgar)

Eg minnist, sum var tað í gjár, tá ið brøðurnir Eyðun og FinnBjørn Karbech Mouritsen í 1962 lótu upp málingahandil í kjallaranum hjá Linu Arge. Húsini stóðu á horninum V. U. Hammarshaimbsgøta og J.C. Svabosgøta í Havn. Plássið var ikki stórt, men sølan av máling gekk beinanvegin strálandi. Læs resten →

Bumbuholið við Íslandsvegin. Tá vit ungu sóu bumbuholið fyrstu ferð, var tað tilgrógvið og sýntist tí minni enn á myndini.

Nú ein dagin eg spákaði úti í Mattalág í Havn, kom eg at hugsa um mynd av stórum bumbuholi frá seinna heimsbardaga. Vit børn vistu fyrst í 1950 – árunum um tvey stór hol í Mattalág, har týskur flúgvari kastaði tvær bumbur. Eg spurdi einaferð mammu um hendingina, og hon minnist hendingina væl. Mamma og pápi fluttu í nýggju húsini við Landavegin í 1941, og hon sigur soleiðis:

– Guttormur Poulsen systkinabarn mammu var altíð bangin, tá hann hoyrdi bumbulúðurin ýla. Henda dagin var Guttormur inni hjá okkum, og tá hann hoyrdi lúðurin og flúgvaran, sprakk hann á dyr og helt leiðina vestureftir út eftir Landavegnum, har fá hús tá vóru. Men Guttormur kom ikki so langt, tí flúgvarin kom í sama rættning, sum Guttormur rann, og kastaði bumburnar í Mattalág tætt við Íslandsvegin. Tá báðar bumburnar brustu, goymdi Guttormur seg undir eini brúgv um Rættará. Við Ellisheimið spældu vit ungu millum nógvar leivdir frá krígnum, tí har stóðu enn fýra barakkir og fleiri húsagrundir. Ikki fyrr enn í 1960 – árunum vóru barakkirnar burturbeindar og millum annað Heilsufrøðilig starvsstova og garaga til líkbil bygd á staðnum. (Vagnur)