Barnaróður gentur í Sørvági. Frammi í oddinum fyrst Fípan fagra, síðan Pílur, Sílið, Frúgvin og Strípan..

Barnaróðurin fær ikki nógva umrøðu í fjølmiðlunum, men barnaróðurin er áhugaverdur. Spell, at vit ikki síggja livandi myndir frá róðrunum, tí at síggja 25 barnamanningar er frálíkt sjónvarpstilfar. Nógvir bátar, nógv ungfólk og nógv foreldur og onnur, sum kundu blivið til frálíkt róðrarinnslag í 3-2. Eg havi loddað dýpið og spurt meg fyri, hvussu gongst at starta barnamanningarnar, og afturmeldingarnar eru góðar. – Tey ungu duga eins væl og tey eldru at leggja bátarnar til startin. Tey lurta væl eftir startdómaranum. Jú, tað gongur bæði skjótt og væl, verður sagt. Læs resten →

Óvæntað úrslit í Sørvági. Sjáldan eru fýra 10-mannafør so jøvn. (Mynd Jógvan Helgi Hansen)

Nú var eg leygardagin upptikin av brúdleypi allan dagin og kvøldið við, tí var ikki tíð til kappróður. Ja, so var fjarstøðan so long frá bryggjuni út til bátarnar, at okkara myndatól rakk ikki nóg væl út til bátarnar. Nú havi eg sæð róðrarnar Í Kringvarpinum og lánt tríggjar myndir frá Jógvan Helga Hansen, sum hevur hesa longu linsurnar, sum røkka langt. Vit vita øll, at veðrið er partur í føroyskum kappróðri, og í Sørvági sæst beinanvegin, at bátarnir næst landi róðu í slættari sjógví enn bátarnir úti á, tí fingu vit fýra nýggjar vinnarar á vestanstevnu. Fyrimunurin var serliga fyrra part av teininum. Læs resten →

Hvør bátur vinnur róðurin á ólavsøku? Mítt uppskot er, at myndin er tikin í 1976 ella 1977.

Mær dámar væl at fáa eldri mynd í hondina, og so leita fram upplýsingar til myndina. Sum oftast liggur væl fyri, men árstalið til hesa myndina finni eg ikki. Tú kanst leita á drekin.fo, har hagtøl eru aftur til 1973, og tú kanst lesa í bókini Drekin, har ólavsøkuhagtøl eru frá 1982 og aftureftir. Trupulleikin við hesi mynd er, at Havnarbáturin liggur næst Molanum, og at Skálabáturin eisini er frammi í oddinum. Men hvør vinnur róðurin? So er tað báturin við 6-talinum, sum eg fái at vera Vestmenning, tí eg haldi meg kennast við róðursmannin. Men har er einki grønt drekahøvd. Myndin er frá seinast í 1970-árunum, tí næstu árini er Nólsoyingur frammi í oddinum, og tann báturin er svartur. Haldi við vist, at Ùtvarpsbáturin er báturin hjá Gimma. Kanska onkur veit at siga mær, nær myndin er tikin. Hevði myndin verið ein litmynd, var nemt at funnið út av, hvørjir allir bátarnir eru. Mítt uppskot er, at myndin er tikin í 1976 ella 1977. Til stuttleika kann nevnast, at á ólavsøku 1979 kappaðust tíggju 10-mannafør á Havnarvág. (Vagnur)   PS: Nú sigi eg takk, tí fleiri hava upplýst, at árið er 1974. Havnarbáturin bleiv nr 1, Skálabáturin nr 2 og Vestmenningur nr. 3. 1974 var fyrsta árið, at róð var av Argahøvda og fram við Molanum. So myndin er søgulig.

Skipar Hansens steinur sleppur at standa, nú sprongd verður fyri parkeringsplássum. (Mynd Vagnur)

øø

Stórt spreingivirksemi fer fram við høllina á Hálsi, tí høll skal byggjast uppí núverandi høll, og nógv parkeringspláss skulu gerast eystanfyri høllina. Tey hava sett girðing um økið, men eg síggi, at stórur vakur steinur sleppur at standa. Sjálvandi, vil eg siga, tí hetta er søguligur steinur, sum verður róptur Skipar Hansens steinur. Vit skulu heilt aftur til 1808 til navnframa Brillumannin til tess at fáa at vita, hví hesin steinur kom at vera róptur Skipar Hansens steinur. Læs resten →

Sørvágur er frálíkt róðrarøki eisini til longu teinarnar. (Mynd Vagnur)

Klokkan er tíggju leygarmorgun, og nógv er á skránni í dag. Ein sonur skal giftast klokkan 14.00, veitsla í kvøld klokkan 18.30, men so er eisini kappróður í Sørvági. Báðar myndirnar tók eg í 2007, tá eg skrivaði grein um kappróðurin í Sørvági, sum hevði torført at fóta sær, sjálvt um kappróður í Sørvági hevur djúpar røtur. Tað er flogbóltur, sum í ítrótti setur Sørvág á Føroyakortið ikki kappróður. Afturvendandi spurningurin er, tá illa gongst í hond, um rætt er, at hava so nógv róðrarøki í Føroyum. Jú, tað er rætt, haldi eg, men so mugu “hørð” krøv setast til fyrireikingina. Læs resten →

Í Plantajuni fyri 60 árum síðani. Verður rætt atborið, er pláss bæði fyri svanum og fólki. Svanurin og eg sínast at vera væl. Tað bar til fyri trýss árum síðani, so eigur tað eisini at bera til í 2016. (Myndaeigari. Einar Michelsen)

Skakandi tíðindi at hoyra av Eiði, at Eiðis kommuna hevur avlívað svanirnar á Eiðisvatni. Tað mátti vera frægari háttur at latið svanirnar liva enn at kappað høvdu av vøkru fuglunum. Myndin omanfyri er um trýss ára gomul. Mamma, pápi, omma mín Amanda, ein beiggi mín og eg eru í Plantajuni í Havn og vitja svanirnar. Nógv fólk komu í Plantajuna at síggja svanirnar, nógvu dunnurnar og njóta friðin. Havi ongantíð hoyrt, at svani í Plantajuni hevur skatt barn. Um so er, so hava foreldrini ikki ansað nóg væl børnunum. Læs resten →

Ikki kemur óvart á meg, um Ormurin vinnur á Eysturoyingin í Sørvági. (Mynd Bjartur Vest)

Torført kann mangan vera at spáa um úrslitini í kappróðri, men tú hevur altíð eina ábending ella eina innaru kenslu, hvat fer at henda. Vit hava nú róð fýra FM-róðrar, og tríggir eru eftir at rógva. Hyggur tú í stigatalvurnar á Stavnur.fo, so hava fleiri manningar longu vunnið FM-heitið, sjálvandi um einki heilt serligt hendir bátunum. 10-mannafarið Eysturoyingur, 6-mannafarið Rádni kvinnur, 6-mannafarið Smyril menn og 5-mannafarið Firvaldur gentur vinna FM-heitið. Vit mugu uttan iva bíða til á ólavsøku, hvør dreingjabátur vinnur FM-heitið, 5-mannaførini við kvinnum, og hvat 8-mannafar vinnur FM-heitið. Annars haldi eg, at Ormurin fer at taka Eysturoying á vestanstevnu. Læs resten →

Havfrúgvin fer fyrst um málið. Síðani Títlingur, Jallurin og Royndin fríða. (Mynd Dánjal Samuelsen)

Barnaróðurin hevur framvegis góða undirtøku, sjálvt um fleiri rógvarar eru farnir uttanlands í summarfrí ella spæla hondbólt uttanlands í løtuni. 25 manningar róðu í Vági. Fleiri bátar hava tí fleiri enn teir seks rógvararnar, tá róðrarárið verður lagt til rættis. Hetta kom væl við hjá dreingjunum umborð á Havfrúnni úr Vestmanna, tí fríggjakvøldið klokkan 21.30 komu boð frá rógvara, at hann kundi ikki rógva dagin eftir í Vági, tí hann skuldi til skips. Hvat var so at gera? Læs resten →

Vakurt at síggja tey fýra 10-mannaførini fara um málið. (Mynd Teitur Samuelsen)

Av teimum sjey FM-róðrunum á jóansøku var lætt at gita um úrslitini í fimm róðrum, tí undanfarnu stevnur siga frá hesum. Umborð á Firvaldi við gentum, Erlu kongsdóttir við kvinnum, Rádna við kvinnum, Smyrli við monnum og Nevið reyða sita so mikið góðar manningar, at torført er hjá hinum manningunum vinina á úrmælingunum. Øðrvísi er við dreingjabátunum og 10-mannaførunum. Eg vónaði, at vit komu at uppliva, at Eysturoyingur ikki fekk góðan start, eins og hann fekk fyrstu tríggjar FM-róðrarnar. Og tað var júst tað, sum hendi á jóansøku. Hóast heldur ringan start, megnaði Eysturingur tó at vinna róðurin. Hetta vísir styrki umborð á 10-mannafarinum úr Runavík. Læs resten →

Bátarnir eru júst komnir í land av Smyrli og klárir at flota. Fyrst barnamanningarnar. (Mynd Teitur Samuelsen)

Gott róðrarveður í Vági. (Mynd Teitur Samuelsen)

Havi júst fingið sendandi tvær myndir úr Vági í sambandi við, at allur kappróðrarflotin er farin á jóansøku at rógva kapp. Nakrir bátar fóru longu fríggjadagin til Suðuroyar, og í morgun klokkan tíggju fór Smyril av Havnini beinleiðis á Vág við nógvum bátum og hartil nógvum róðrarfólki. Úr Vági verður sagt, at sólin skýnur og lítið lot er á fjørðinum. Fløggini siga, hvør ættin er. Tað plagar at ganga heilt væl at starta bátarnar í Vági, tí fasti starturin er tjóðraður í land. Tey hava sett klokkutíð á ymsu róðrarnar, og spennandi at fylgja við, um tey megna at halda tíðina. Spennandi seinnapartin, tí nú hava manningarnar havt fjúrtan dagar at fyrireika seg til jóansøkuróðrarnar. Fáa vit nýggjar vinnarar í dag? Kanska, vit bíða spent. (Vagnur)