Áhugaverd mynd úr Gundadali tikin umleið 1950. (Mynd Havnin – fólk og yrki)

Tá eg kom fram á myndina omanfyri, sat eg góða løtu og hugsaði, hvussu nógv er broytt í Gundadali, síðani eg var smádrongur. Tí tá sá Gundadalur út, sum á myndini. Í 1910 fór menn undir at gera fótbóltsvøll í Gundadali, og 18. juni 1911 var fyrstur dystur spældur á vøllinum. Uttast til høgru úti við ánna síggja vit HB húsið, sum var bygt í 1931, og miðskeiðis í myndini B36 húsið, sum var bygt í 1942. Vøllurin var 108 metrar langur og 80 metrar breiður. Vit síggja eisini hondbóltsvøllin, sum var gjørdur í 1937. Nærmast síggja við skíðbreytina, sum var gjørd frá HB-húsinum og niðan á høvdina, men henda breytin riggaði ikki nóg væl, tí vindurin fór við kavanum, sum var lagstur á breytina um veturin. Annars er stóra barakkin har, tað sama Hvíldarheimið, húsini í Mexico og tennisvøllurin. Áhugaverd mynd, sum er tikin umleið í 1950. Tá í tíðini rullaðu ikki so nógvar milliónir úr kommunukassanum og FIFA kassanum í Gundadal, sum tær gera í dag. (Vagnur)

Hørð kapping millum Píl og Fípuni føgra at vinna barnaróðurin við gentum í Vestmanna. (Mynd Dánjal Samuelsen)

Róðrafelagið Knørrur barnaróður við gentum og dreingjum vann báðar róðrarnar í Vestmanna. Seinnu árini hevur bláa felagið á Müllersbrúgv havt nógvar góðar barnamanningar. Vit fegnast øll um stóru luttøkuna í barnaróðri, og tá eg práti við barnamanningar í Álakeri, so er eingin munur á barnamanningum og øðrum manningum. Tey ganga øll upp í kappróður við lív og sál. Øll vilja vinna ella gerast betri á hvørjari stevnu. Nú stundar til ólavsøku, og eg hoyrdi mann frá Kringvarpinum siga leygardagin, at talan er um at flyta ólavsøkróðrarnar soleiðis, so barnamanningarnar byrja klokkan  trý. Hetta, so barnamanningarnar og foreldrini eisini sleppa til skrúðgongu og setanina. Er tað nú rætt? Læs resten →

Ormurin fer her tepurt fyrstur um málið. (Mynd Hvannrók)

Nú er tað vorðið soleiðis hjá mær í føroyskum kappróðri, at tú ert eins spentur um úrslitini, og tú ert, hvussu gongst at avgreiða róðrarnar. Eri ikki tryggur og havi ikki rættiliga álit á fyrireikingini. Soleiðis var eisini leygardagin í Vestmanna. Tá eg klokkan 15.00 setti meg við telduna. og teir longu fóru at tosa um hanafót, hugsaði eg mítt og fór frá telduni at takast við okkurt annað. Tað var dekan ov seint at hugsa um hanafót, tá klokkan er 15.00. Vit mistu ein tíma í frálíkum róðrarlíkindum, og spurningurin er, um vit skulu góðtaka slíkt, sum fór fram í Vestmanna? Læs resten →

Hjartaliga tillukku vit teimum sjeyti árunum. Birgar, tú ert fantastiskur. (Mynd Vagnur)

Vit, sum eru fødd og uppvaksin í Havn og onnur við, hava so nógv at takka Birgari Johannessen fyri. Birgar hevur savnað tilfar um Havnina, sum ikki kann virðismetast nokk og ikki kann roknast út í peningi. Tað er bara at hyggja í báðar bøkurnar Havnin – fólk og yrki. Hvussu Birgar hevur borið seg at at útvega so nógvar virðismiklar myndir og savnað tilfar um Havnini, er torført at ímynda okkum. Birgar hevur eginleika sum savnari, ein eginleiki, sum vit onnur fáa gleði av. Stóra hjálp fekk hann frá konuni Elsu, sum ikki er millum okkum longur. Fríggjadagin vitjaði eg Býarsavnið, sum Birgir júst hevur latið upp. Tú ert fantastiskur Birgar, tað skalt tú eiga. Læs resten →

Manningin á Miðvingi frá gullárunum. Manningin var: Eliesar Ellefsen, Joen P. Frederiksen, Hans J. Poulsen, Jon Joensen, Bjarnir Joensen, Edmund Johannesen, Christoffer Joensen, Albin Vang og Eikil Rasmussen. Niclas í Koltri er eisini á myndini.

Myndina omanfyri sá eg í bókini ÍSF 50 ár, sum kom út í 1989. Steðgaði við hesa mynd, tí eg minnist væl sum smádrongur 8-mannafarið Miðving frá hesum árunum. Niclas í Koltri smíðaði bátar úti í Koltri, sum skrivað er í grein niðanfyri. Í 1961 flutti Niclas í Koltri til Havnar og bygdi sær hús úti á Heygnum Mikla, har hann smíðaði bátar í kjallaranum. Eg vitjaði mangan Niclas. Nýggi Miðvingur var ein so mikil góður gongubátur, at hini 8-mannaførini høvdu ongan møguleika ímóti bátinum. Næstu árini smíðaði Niclas mest sum øllum róðrarfeløgunum nýggjar bátar. Kappróður hevur djúpar røtur í Miðvági, og tey hava varðveitt 8-mannafarið frá 1957. Miðvingur var fyrsti kappróðrarbátur Niclas smíðaði. Miðskeiðis í 1990-árunum gjørdust bátarnir hjá Niclasi ikki tíðarhóskandi, tí nú var Sámal Hansen úr Runavík farin at smíða lættari bátar. Nógvir kappróðrarbátar, Niclas í Koltri smíðaði, eru varðveittir. (Vagnur)

Niclas við hegniður bátasmiður. (Mynd Magn)

Niclas í Koltri er stórur partur av føroyskari kappróðrarsøgu, tí tað var Niclas, sum breyt upp úr nýggjum í 1957 og smíðaði 8-mannafarið Miðving, sum var lættari og við smidligari sniði enn vanligi róðrarbáturin. Hetta var fyrsti bátur í Føroyum bara ætlaður til kappróður.

Sum ungur kom eg í kjallaran hjá Niclas og konuni Elisabeth úti á Heygnum Mikla í Havn, har Niclas hevði verkstað og smíðaði bátarnar. Spennandi at fylgja við, hvørja ferð Niclas var um at vera liðugur við kappróðrarbát. Og tað var tann tíð, tá ið Niclas smíðaði mest sum allar kappróðrarbátarnar í Føroyum. Niðanfyri nakrar hugleiðingar um bátasmiðin Niclas í Koltri.

Sum smádrongur hoyrdi eg um hylin hjá Niclas í Koltri úti Koltri, har ein stórur floti av smábátum lá. Har vóru sluppir, línubátar, skonnartir og onnur skip og bátar. Hetta vóru bátar, sum pápin og pápabeiggin høvdu smíðað, men longu sum ellivu ára gamal smíðaði Niclas fyrsta borðbátin, sum eisini slapp í kenda hylin við smábátunum.

Niclas segði mær í grein í 14. september í 80-árunum, at hann frá smádreingi altíð hevði góðan hug til smíð. Læs resten →

Pláss er ikki at byggja Tjóðpall Føroya á Skálatrøð, tí bilarnir eru so nógvir. (Mynd Vagnur)

Ein dagin eg skuldi finna mær parkeringapláss á Skálatrøð, lá heilt illa fyri, tí øll parkeringsplássini vóru upptikin. Hetta var mitt á degi. Tá kom eg at hugsa um, hvussu vilt tað er at byggja Tjóðpall Føroya á Skálatrøð, tí ein tjóðpallur kann byggjast aðrastaðni í Havn. Og ikki er neyðugt, at tjóðpallurin liggur niðri við sjóvarmálan. Ein tjóðpallur og sjóvarmálin hava einki til felags. Tað vanta heilt nógv parkeringspláss í miðbýnum, og fólkini, sum búgva í miðbýnum og eldra partinum í Havn, hava kært sína parkeringsneyð fyri Tórshavnar kommmunu. Stórur eftirspurningur er at fáa hendur á økinum á Skálatrøð, og býráðslimir tosa um at gera parkeringshillar á Skálatrøð. Latið økið á Skálatrøð fáa frið, og so skal nýggja býráðið eftir valið vísa á nýtt grundøkið til tjóðpall. At byggja tjóðpall niðri á Skálatrøð er púra vilt, tí økið er longu upptikið. (Vagnur)

Drekin reyði og Havnarbáturin venja á Havnarvág týskvøldið. (Mynd Vagnur)

Nú telja vit fyrst niður til fjarðastevnuna í Vestmanna leygardagin, og so gleða vit okkum til ólavsøkuróðrarnar. Sjálvt um Drekin reyði vann á vestanstevnu í Sørvági, so má Eysturoyingur metast sum favorittur í Vestmanna, tí úrslitini frá undanfarnum róðrum boða frá hesum. Eg var úti á Argjum týskvøldið, og tá var lagið gott á monnum umborð á Drekanum reyði, sum júst flotaðu bátin til venjingar. Leygardagin fáa vit eisini at vita, um 6-mannafarið Hvessingur kann endurvinna sigurin frá vestanstevnu, og tað sama 5-mannafarið Teisin við kvinnum og Tjaldrið við dreingjum. Vit fáa heilt vist aftur onkran nýggjan vinnara ella báðar tveir á fjarðastevnu leygardagin. Læs resten →

Tær rógva væl umborð á Sølmundi, men tær hava enn til góðar at náa Rádna úr Fuglafirði. (Mynd Vagnur)

Beint fyri ólavsøku í fjør var eg í støðni á Argjum til tess at vita, hvørjar kvinnur mannaðu 5-mannafarið Rituna, sum Norðdepils-Hvannasunds róðrarfelag eigur. Kvinnurnar skuldu mannað 6-mannafarið Sundabátin, men tær fingu ongan bát at rógva ímóti, tí vóru tær mest sum tvingaðar at rógva við 5-mannafari. Á ólavsøku í fjør gav Róðrarsambandið Masterskvinnum loyvi at rógva sum vanlig 6-mannafør, sjálvt um tær ikki róðu allar sjey FM-róðrarnar. Henda avgerð var heilt burturvið. Á støðni á Argjum síggi eg, at kvinnurnar, sum rógva við Sølmundi, eru mest sum tær somu, sum róðu við Rituni í fjør. Tær havi eg hitt. Læs resten →

Tunlarnir Norður um fjall vóru tiknr í nýtslu í 1967. (Mynd Vagnur)

Eg stúrsaði við í gjár, tá eg hoyrdi í útvarpinum, at gomlu tunlarnir í Norðoyggjum ikki kunnu gerast fyrr enn í 2022. Eisini stúrsaði eg við, at tá herfyri hoyrdist, at meðan Landsverk ikki hevur pening til nýggjar maskinur, so tey kunnu halda ferðsluna koyrandi um veturin, tá kavi er, so fossa milliónirnar í pengakassan í Havn, har einki er óført. Tá talan er um gomlu vandamiklu ótíðarhóskandi tunlarnar Hvalbiartunnilin frá 1963 og tunlarnir Norður um fjall í Norðoyggjum frá 1967, so hava politikararnir í Norðoyggjum og Suðuroy sovið í tímanum í alt ov nógv ár. Ússaligt, má sigast, tí hesir tunlar skuldu verið gjørdir fyri nógvum árum síðani. Læs resten →