Ormurin langi vann stuttleikaróðurin við seglum.

Í sambandi við bátafagnaðin í Sunnba og Lopra seinasta vikuskifti kannaði eg eitt sindur um fólkatalið í kommununi, sum eru tær fýra bygdirnar Sunnba, Lopra, Akrar og Víkabyrgi. Havi tosað við skrivaran í kommununi, og hon segði mær, at tað búgva umleið 350 fólk í kommununi. Eini 100 fólk í Lopra, 220 í Sunnba, 30 á Økrum og eingin býr í Víkabyrgi. Fyri umleið 25 árunum síðani búði um 540 fólk í kommununi, og tað má siga at vera stór minking í %-um. Men aftur til bátafagnaðin seinasta vikuskifti. Læs resten →

Sunnbingurin frá 1957 og Ormurin langi rógva um kapp á Lopransfjørði.

Eg var ómetaliga spentur at síggja umvælda Sunnbingin, sum Brestir Vestergaard, hevur umvælt og gjørt kláran til Ment 2014 ella rættari sagt bátafagnaðin, sum sunnbingar skipaðu fyri seinasta vikuskifti. Vakrir bátar, vakrar myndir og nógv fólk. Eftir ætlan skuldi tiltakið vera í Sunnba, men Sunnbøur er brimpláss, og henda dagin var veðrið ikki til vildar, og tí var tiltakið flutt til Lopra. Læs resten →

Jón Viðstein í skiparastólinum umborð á Váðasteini. (Mynd Vagnur)

Í góðveðrinum mánamorgunin lá línuskipið Vágasteinur við bryggju við “Ískaiina” í Havn og tók ís, tí klokkan eitt skuldi skipið undir Føroyar at royna. Váðasteinur er í mínum hugaheimi ein býarmynd á Havn, tí síðani 1977, tá ið skipið varð bygt á Tórhavnar skipasmiðju, hevur tú sæð Váðastein komin og farin inn um Molan ella hevur ligið við bryggju. Eg havi altíð fylgt Váðasteini. Læs resten →

Mynd HSF.

U20 landsliðsvenjararnir Kári Nielsen og Birgir Hansen hava tikið út spælararnar, sum í døgunum 21. til 25. mai skulu spæla IHF Trophy kapping í Andorra. Tá ið eg sá nøvnini á teimum fjúrtan landsliðsspælarunum, kundi eg bara enn einaferð staðfesta tað, sum eg í nøkur ár havi havt varhugan av: H71 hevur nú veruliga yvirhálað Neistan og Kyndil á dreingja- og manssíðuni, tí meðan ein neistaspælari og eingin kyndilsspælari eru á  U 20 landsliðnum, eru seks H71 spælarar, tríggir vestmenningar, tveir strandingar og tveir útsetar. Her má ein klokka ringja onkrastaðni. Læs resten →

Frá vinstru Kirstin, Betina og Jastrið. Fremst Sofía við heiðursmerkunum. ( Mynd Vagnur)

Manningin umborð á 5-mannafarinum Erlu Kongsdóttir úr Fuglafirði er ógvuliga sjáldsom. Tey hava mannað bátin av nýggjum við gentum, tí genturnar, sum vunnu FM-hetið í 2012 og 2013 eru farnar av bátinum. Eldri kvinnur róðu í fjør við 6-mannafarinum Rádna, men nú hava tey mannað Erlu Kongsdóttir við trimum eldri kvinnum frá Rádna, einum nýggjum rógvara og tvíburunum Jastrið og Kirstin, sum í 2012 og 2013 vunnu FM-heitið við bátinum. Eg havi hitt Betinu Toftegaard, sum er mamma tvíburarnar, rør sjálv við Erlu Kongsdóttir og er forkvinna í ÍF kappróðri. Læs resten →

Brandur Isaksen bátsformaður á Kvívíkingi. (Mynd Vagnur)

Hugaligt at síggja ljósabláa 8-mannafarið úr Kvívík rógva snarróður á Havnarvág. Kvívíkingur hevur drúgva róðrarsøgu. Báturin er í summar mannaður við rógvarum úr Kvívík og Vestmanna.

Neystið hjá Kvívíkar Róðrarfelag stendur á Válinum, men neystið er ikki heilt tíðarhóskandi. Eg havi hitt bátsformannin Brand Isaksen, og hann sigur: – Vit fingu ikki nóg góðan start í snarróðrinum, men annars eru vit nøgdir við avrikið, og vit eru bjartskygdir um róðrarárið..

– Tú spyrt um neystið á Válinum? – Har stendur Kvívíkingur, loftið er innrættað, og har standa rógvimaskinurnar. Neystið er frálíkt, men góðar brúsuumstøður vanta. Í summar hava vit bara tvær manningar í felagnum, 8-mannafarið og Junkaran barnamanning dreingir. Læs resten →

Tað oysregnaði hesa løtuna, myndin varð tikin. (Mynd Vagnur)

Myndin omanfyri er av 8-mannfarinum Gullbrandi úr Fuglafirði. Báturin er á veg út á málið at rógva snarróður. Umborð sita fýra kvinnur og fýra menn við árarnar. Blandaður snarróður er fyri 8-mannafør, og leygardagin fóru trý 8-mannafør um málið. Fyrst Gullbrandur, síðani Argjabáturin og Heiðabáturin. Rógvarar halda tað vera stuttligt at royna blandaðan snarróður, og serliga kvinnurnar halda tað vera forkunnugt at sita í 8-mannafari. Eg havi sjáldan sæð slíkt grimdarregn á Havnarvág. Droparnir stukku úr aftur sjónum. Veðrið kunnu vit einki gera við, og tað sýntist, sum rógvarar ikki vóru so nógv ávirkaðir av veðrinum, tí veðrið er stórur viðspælari í kappróðrinum. Men eg helt, at serliga ungu rógvararnir ikki høvdu latið seg í eftir veðrinum, sum kom óvart á teir. Hetta skulu tey ungu læra, nú FM-róðrarnir standa fyri durum. Á toftini í bakborð umborð á Gullbrandi situr Betina Toftegaard forkvinna í ÌF kappróðri.  Hana fekk eg orð á, sum kemur í seinni grein. (Vagnur)

Klaksvíkingur, Hoyvíkingur, Suðuroyingur, Havnarbáturin og Ormurin nærkast málinum. (Mynd Vagnur)

Leygarkvøldið var snarróður fyriskipaður á Havnarvág. Í august mánað í fjør skein sólin bæði oman og niðan, men leygarkvøldið fór at oysregna, júst sum snarróðurin byrjaði. Klokkan var farin av hálvgum sjey, tá ið íslendska farmaskipið fór út um Molan, og tá nústani kundu menn leggja fasta startin. Hetta førdi til, at mistir vóru tjúgu minuttir, og tí brast skotið fyri fyrsta róðrinum klokkan 19.20. Síðani gekk væl at avgreiða róðrarnar. Hugaligt at síggja kappróðrarbátarnar aftur á Havnarvág, og fólk vóru fegin um tiltakið. Ùrlitini og tíðirnar eru allar niðast í greinini. Læs resten →

Tað verða ikki hesir menninir, sum mannað Eysturoying í summar, men aðrir ungir garpar. (Mynd Christopher)

Tá ið eg hoyrdi, at nú var 10-mannafarið Eysturoyingur mannaður, ringdi eg til forkvinnuna í NSÍ kappróðri Karhild Johansen til tess at fáa váttað tíðindini, og hon sigur. – Tað er rætt, at Eystuoyingur er mannaður, og báturin er við í snarróðrinum leygardagin í Havn. Teir, sum rógva við bátinum, hava ikki áður róð við Eysturoyingi, men við øðrum bátum í felagnum. Møguleiki er eisini, at vit í summar fáa mannað 8-mannafarið Heiðabátin, sigur Karhild í stuttari viðmerking. Klaksvíkingur er við í snarróðrinum leygardagin, og úr Klaksvík verður sagt, at hetta er roynd at fáa eggjað monnum at fáa mannað bátin eisini til FM-róðrarnar í summar. Higartil eru fimm 10-mannafør við í snarróðrinum leygardagin. Eysturoyingur, Ormurin, Hoyvíkingur, Klaksvíkingur og Havnarbáturin. Gott hevði verið, um vit eisini sóu øll fimm 10-mannaførini í fyrsta FM- róðinum á norðoyastevnu. (Vagnur)

Eitt er veljarakanning, annað er, hvør situr í løgtinginum eftir næsta løgtingsval. (Mynd Vagnur)

Herfyri varð kunngjørd veljarakanning, sum sjálvandi altíð skal takast við fyrivarni. Eitt er veljarakanning, sum er ein støðumynd, annað er, tá ið veljarin skal seta krossin valdagin. Tú skalt ikki vera serkønur í politikki at síggja, at núverandi samgonga missir undirtøku. Hetta byrjaði longu við flatskattaskipanini, har tey “ríku” fingu enn meira. Sálarklárt, at Sambandsflokkurin missir mest í veljarakanningini, tí flokkurin hevur framt nøkur smá sjálvmál í seinastuni, og at veljarar tí “fyribils” venda flokkinum bakið og flyta seg serliga yvir í Javnaðarflokkin, tí hvar skulu veljararnir annars fara? Læs resten →