Við sigrinum í Klaksvík hevur Kyndil lagt seg eitt stig framum VÍF/Tjaldur um at koma í FM-finalurnar, men liðini skulu spæla enn fýra dystir, áðrenn vit finna liðið, sum skal spæla ímóti Neistanum í FM-finalunum.
Í mínum eygum var týdningarmikið fyri spenningin, at VÍF/Tjaldur fekk eitt stig í Vági, tí hetta stigið kann gerast “stigið”, sum bjargaði VÍF/Tjaldri møguleikanum um at náa FM-finalunum.
Men allar fyrst má VÍF/Tjaldur vinna ímóti Kyndli í Vestmanna 27. mars. Eirikur Magnussen sá dystin í Klaksvík millum Stjørnuna og Kyndil.
– Vit sóu ein rótutan kvinnudyst við fáa málum, nógvum brendum uppløgdum møguleikum og nógvum villum. Serliga fóru nógv av skjótálopunum hjá báðum liðunum í “vaskið”, tí sendingarnar vóru ikki nóg góðar fram eftir vøllinum. Kyndil var á odda mest sum allan dystin, og tað vóru serliga Tomma í Kyndilsmálinum og Anja Heinadóttir, sum vunnu Kyndli dystin. Tær vóru klárt bestar hjá Kyndli.
– Seinast í seinna hálvleiki roynir Stjørnan at verja 4-2 og skeivan 5-1, og hetta eydnaðist so mikið væl, at Stjørnan fekk Kyndil aftur og bara eitt mál var á muni 15-14 til Kyndil. Í hesi løtu brendi Stjørnan fýra upplagdar møguleikar. Men tvey týdningarmikil stig til Kyndil, sigur Eirikur úr Klaksvík.
Dystargongdin var henda: Tíggju minuttir spældir, og støðan 4-4, men Kyndil leggur seg á odda næstu tíggju minuttirnar til støðuna 9-6 til Kyndil. Stjørnan fær bara eitt mál seinastu tíggju minuttirnar, tí kann Kyndil fara til hálvleiks við tryggari 12-7 leiðslu.
Í seinna hálvleiki byrjar Stjørnan væl og vinnur fyrstu tíggju minuttirnar 5-2, og nú er støðan 14-12 til Kyndil. Og Stjørnan kemur enn nærri til støðuna 15-14 til Kyndil, men so skjýtur Stjørnan bara tvey mál seinastu tíggju minuttirnar, meðan Kyndil skjýtur fýra mál. Kyndil vinnur týdningarmikla dystin og er framvegis best fyri at náa seinna FM-finaluplássið. Ragnar Simonsen og Regin Petersen dømdu dystin.
Málskjúttar Stjørnan: Ema Bezanovic 7, Durita Christophersen 3, Ella Petersen 2, Lovisa Lassen 2, Mina Sirdal 1 og Bára S. Klakstein 1
Málskjúttar Kyndils: Anja Heinadóttir 7, Simona Petersen 3, Turið Arge 2, Annika Sigurðsdóttir 2, Randi Wardum 2, Jórun G. Ludvig 1, Anna Sofía Mohr 1 og Simona Iajob 1
VB-VÍF/Tjaldur 27-27 (15-13) VÍF/Tjaldur vann sær týdningarmikið stig
Eg ringdi til Vágs at fáa eitt sindur at vita um dystin millum VB-VÍF/Tjaldur, men fólk vóru fáorðað, tí viðkomandi helt, at VÍF/Tjaldur skuldi ikki fingið annað stigið seinast í dystinum. Annars vóru tey væl nøgd við spælið hjá VB, og tey iðrað seg, at VB ikki kann spæla eins væl í fyrra hálvu av kappingini, tá ið liðið bara fekk trý stig í seks heimadystum. Nú bleiv ov seint, tá ið talan er um at náa FM-finalurin. VB kundi fingið bæði stigini í dag, tí brotskast blev misnýtt í seinasta minutti. Taktikkurin hjá VÍF/Tjaldur var at spæla lang álop og spæla Adinu og Liljuna upp til skot, sum eisini skutu sjey mál hvør, verður sagt úr Vági.
Dystargongdin var i stuttum henda: VB er á odda alla fyrra hálvleik. Tíggju minuttir spældir og 8-4 til VB. Tjúgu minuttir spældir og 13-9 til VB, men tað er VÍF/Tjaldur sum minkar um munin niður í tvey mál beint fyri hálvleik, sum endar 15-13 til VB.
Ì seinna hálvleiki byrjar VÍF/Tjaldur sum eitt ódnarveður og eftir níggju minuttir, er VÍF/Tjaldur á odda 19-18, men nú er tað tað beru javnleiki 19-19, 20-20, 21-21, 22-22, 23-23, 24-24 og 25-25, men so leggur VB seg á odda 27-25, og bara fýra minuttir eftir at spæla. Men tá hevur VÍF/Tjaldur eitt skifti verið á odda 25-24. Seinastu fýra minuttirnar eydnast VÍF/Tjaldur at fáa javnleiki í hús, meðan VB kann iðra seg við brendum brotskasti í næstseinasta minutti. Frálíkur hondbóltsdystur, verður sagt úr Vági.
Málskjúttar VB: Tamara Radic 8, Helga Eyðunsdóttir 6, Bára Krosslá Mortensen 4, Gurið Mortesen 3, Rannvá Johannessen 2, Una Nolsøe 1, Rúna Midjord Jacobsen 1, Marijana Trbojevic 1 og Andrea Nielsen 1
Málskjúttar VÍF/Tjaldur: Liljan Djurhuus 7, Adina Petrea 7, Amanda Kristiansen 3, Ansy Sevdal 3, Eilin Hansen 2, Heidi Sevdal 2, Annika Patti 1, Tóra Seloy 1 og Barbar Nygaard 1
Dómarar: Arnar Dam og Tummas Juul Thomsen
| Nummar | Lið | Dystir | V.m. | T.m. | Munur | Stig |
| 1 | Neistin | 15 | 475 | 351 | 124 | 30 |
| 2 | Kyndil | 16 | 356 | 354 | 2 | 18 |
| 3 | VÍF/Tjaldur | 16 | 392 | 408 | -16 | 17 |
| 4 | VB | 16 | 382 | 411 | -29 | 11 |
| 5 | StÍF | 14 | 350 | 395 | -45 | 9 |
| 6 | Stjørnan | 15 | 340 | 376 | -36 | 7 |