Sivila í Havn . Aftast f.v: Trygvi Restoff, Jákup Frederik Olsen, Napoleon Christiansen “Poli í Mattalág, Hilmar Christiansen og Birgir Fylling. Miðraðið f.v: Hans Vang Hansen, Mourits Mohr, Andor Eirikstoft, Torbjørn Zachariassen og Ólavur Dalsgarð. Fremst f.v. Vagn Erik Michelsen, Maria Krog, Anna Sofía Mouritsen, Anna Kristina Nolsøe og Bogi Winther,.

Tá vit eftir deyða Vagn Erik pápabeiggja ruddaðu millum annað í myndagoymsluni, komu vit fram á myndina omanfyri, sum vit kenna úr ymsum bókum. Hetta er góð upprunamynd, sum Vagn Erik hevur ognað sær. Aftan á myndini stendur: Á Ellisheiminum 1941-42. Myndin er tikin við vestara enda á Ellisheiminum, tí vit síggja bakkan móti vestri. Ellisheimið var bygt í 1935. Vit síggja á hjálmunum stavirnar CL, sum merkir sevila loftverjan. Eitt av arbeiðunum hjá loftverjuni var at ganga millum húsini í Havn til tess at syrgja fyri, at einki ljós var at síggja í vindeygunum, tí Havnin var myrkaløgd um hetta mundið. Týsk flogfør vóru at síggja yvir Havnini, og tey gjørdust naskari og naskari. Læs resten →

Mynd av fimleikarum í Havnar Fimleikafelag. Kennist bara við tvey andlit á myndini.

Í myndagoymsluni hjá Vagn Erik Michelsen pápabeiggja ert tú komin fram á hugtakandi mynd av fimleikarum, har menninir hava felagsmerkið hjá Havnar Fimleikafelag í bringuni. Tú situr góða løtu og hyggur at myndini og kennist bara við tvey andlit. Læraran Frøken Cohr (1894-1978), sum stendur uttast til høgru í miðraðnum og Christina Weihe (1906-1995) rópt Kittan, sum stendur næst mannliga læraranum í miðraðnum. Kittan var mamma Petru konu Vagn Erik, og tí er myndin í myndagoymsluni.

Sum unglingi hoyrdu tú mangan um Frk. Cohr, sum var úr Odense og kom til Føroya í 1921 og vera lærari í Millum – og Realskúlanum í Havn og Føroya Læraraskúla frá 1921 til 1964. Minnist væl hesa konu, sum var vinkona Frú Müller stjóra í DFDS fyritøkuni í Føroyum og reiðari hjá fleiri skipum, eftir at maðurin Hans Müller doyði ungur. Løgið at hyggja at gomlu myndini, tí hetta er ættarliðið undan okkum. Tú gerst forvitin at vita okkurt um hesi fólkini, men trupuleikin er, at tú ikki longur hevur nakran at spyrja, tí tey eru øll farin. Ein seinasti møguleiki er Gamlar myndir úr Havn, tí sjálvandi eru fólk, sum kennast við hesar fimleikarar. (Vagnur)

Uttast til vinstru Helge Michelsen við beiggjanum Vagn Erik í fanginum, síðani Moffat Anderson og Aage Michelsen. (Myndin tikin 1933/34)

Úr myndasavninum hjá Gunhild systkinabarn pápa mín fann eg omanfyri áhugaverdu mynd. Á myndini frá vinstru sæst pápi mín Helge Michelsen við beiggjanum Vagn Erik í fanginum. Vagn var ein “eftirnølari” føddur í 1927, tí meðan pápi okkara er føddur 1913 og beiggin Aage, sum vit síggja uttast til høgru, er føddur í 1911, so eru fjúrtan og sekstan ár millum Vagn Erik og beiggjarnar á myndini. Men á myndini er eisini maður, sum eitur Moffat Anderson, og hvør er so hesin maður? Tá eingin er at spyrja, skrivaði eg á Gamlar havnarmyndir, um onkur kennist við navnið, sum stendur skrivað aftanfyri á myndini. Og hjálpina fekk eg. Læs resten →

Nýggjur Havnarbátur á vágni seinnapartin. Vakur bátur má sigast. (Mynd Vagnur)

Seinnu árini hava róðraráhuga staðið spyrjandi, hví ikki er eydnast at manna 10-mannfar hvørki á Argjum ella í Havn. Eingin Havnarbátur, eingin Ormur og eingin Drekin reyði. Bert trý 10-mannafør úr Norðoyggjum.

Á mínum ungu døgum róðu altíð millum seks og níggju 10-mannafør. Havnarbáturin hevur ikki verið mannaður í nøkur ár, men í summar ætlar nýggjur Havnarbátur at bjóða av. Læs resten →

Tá Suðurvarði kom á sleipivognin var eingin skrúva og einki róður. Tyktist, sum báturin skuldi til upphøggingar, men so er ikki. (Mynd Vagnur)

Altíð nógv áhugavert fyri eyguni á Vesturu bryggju. Meira og minni virksemi, skip og bátar fara og koma. Altíð nýggj mynd. Herfyri stúrsaði eg við, tá gamalt rustaður bátur stóð á innara sleipivogninum hjá Mest. Báturin líktist skitnum klútateppi við ongari skúvu og róri, og sum uttan iva var ávegis til upphøggingar uttanlands.

Helt meg kenna bátin, sum nú eitur Christian Høy GR 6-5115 úr Nuuk. Gjørdist forvitin, og so fyrst at venda mær til vinmannin Finn Bjørn Guttesen á Fjóni. Vit tosa mangan um skip í telefonini. Øll skip og bátar hava jú sína søgu.. Læs resten →

Skopun avmyndað í 1899. Veðurbardur sjóvarmáli, eingin bryggja og bátar drignir niðan í bygdina. (Mynd bókin)

Tá eg herfyri var á Gomlurætt og eisini eygleiddi bilar sum komu úr Sandoyartunlinum, kom mær til hugs bóklingin Skopun 150 ár, sum Ólavur Clementsen, sáli, læt úr hondum í 1983. Skopun er av yngstu bygdum í Føroyum og hevur aðra søgu og búseting enn aðrar líknandi bygdir.

Tá vit koma inn í 19. øld, fer manntalið í Føroyum at vaksa munandi, og hetta førir við sær, at nú koma fleiri nýggjar bygdir. Samfelagið broyttist so líðandi frá at vera bóndasamfelag til eisini fiskivinnusamfelag. Læs resten →

Ternan á sleipistøð á Skála Skipasmiðju. Ternan var upphøgd í 1934. (Mynd Tórshavn)

Eg havi áður skrivað um abba mín Christian Christiansen, sum eg ongantíð havi sæð, tí hann doyði í 1944. Men tá ið eg kom fram á mynd av sluppuni Ternuni, sum langabbi mín Havnar-Jógvan og synirnir Christian og Sámal keyptu frá Sørini Müller í 1910, helt eg, at myndin átti pláss á heimasíðuni. Læs resten →

Spennandi at frætta, hvat gerast skal við bygningarnar, tá ið miðnámsskúlin er liðugur. (Mynd Fornminnissavnið)

Dagarnir hjá Studentarskúlanum og HF-skeiðnum í Hoydølum eru skjótt taldir, tí tey byggja nú stóran miðnámsskúla í Marknagili. Myndirnar av Sanatoriinum í Hoydølum eru vakrar, og eisini er vakurt at spáka í Hoydølum. Men niðurslitni betongbygningurin prýður so sanniliga ikki økið. Næmingar gevast sær óivað ikki far um tað, men hjá mær hevur altíð nakað myrkt og dapurt sveimað yvir Hoydølum, tí so nógvar menniskjalagnur eru knýttar at plássinum. Eisini í okkara familju. (Greinin skrivað í desembur mánað í 2015) Læs resten →

Eg minnist einki til hesi klæðini ella nakað frá mínum fyrstu barnaárum.

Eg las herfyri ein greinastubba um at minnast aftur í barnaárini. Tað eru fólk, sum hava so gott minni, at tey minnast alt millum himmal og jørð frá barnaárunum, men so eru vit onnur, sum ikki minnast, hvørjir næmingar vit gingu í fyrsta flokki saman við og nóg illa, hvørji tøl eru skrivað á nummarplátuna. Í greinastubbanum um minnið fekk eg nógv áhugavert at vita, sum eg ikki áður hevði grunað um.

Eitt fýra ára gamalt barn minnist mangt, sum fór fram, tá ið tey vóru tvey ár, men sum tíggju ára gamalt minnist sama barnið ikki hendingar frá tvey ára aldrinum. Tó kunnu ógvusligar hendingar brenna seg so fæst í minnið, at tær aftur og aftur koma fram í minninum hjá barninum. Vanligt er, at børn dvølja ikki í fortíðini.

Eg kenni persónar, sum minnast, hvørjar troyggjur næmingar gingu í í fyrsta flokki, vit onnur minnast ikki allar næmingarnar, sum gingu í fyrsta flokki í Nonnuskúlanum. Læs resten →

Minnist væl Flemsøy, sum á myndini er umbygdur soleiðis, so hann eisini kann fiska við nót. Hetta var í 1965.

Fiskiskapur, bátar og skip hava frá barnaárunum havt mín áhuga. Nú, eg eri vorðin eldri, fylgi eg væl við virkseminum, sum fer fram á Vestaru bryggju. Hvønn dag okkurt áhugavert. Ein dagin kom mær serliga til hugs norskan kópafangara, sum í 1959 bleiv leigaður til Føroya. Partafelagið Norðhavið í Havn var mannað við brøðrunum Thorvaldi Andreasen, Ingolfi Andreasen og Debes Christiansen mammubeiggja. Teir áttu sluppina Fame, sum var keypt úr Vestmanna.

Triðja mai 1959 sakk Fame í Grønlandi, tá sluppin rendi á stórt ístykki sum lá undir í vatnskorpuni. Øll manningin var bjargað. P/F Norðhavið gjørdi skjótt av og leiðaði styrkta kópafangaran Flemsøy M-44-HD at fiska sild norðanfyri Føroyar. Fleiri av manningini umborð á Flemsøy mannaðu bátin á sildaveiðu við Ingolfi Andreasen sum skipara. Hann var eisini skipari á Fame, tá hann sakk í Grønlandi. Hesi árini treyt ikki sild norðanfyri. Læs resten →