6-mannaførini við monnum eru júst farin inn um Molan, við Hvessingi klárt á odda. Vit síggja eisini Gongurólv, Kollfirðing og Stráluna. Vøkur róðrarmynd, má sigast í brennandi sól. (Mynd Vagnur)

Ætlaði mær ikki oman á Ískaina at hyggja at kappróðri á ólavsøku, tí áhugin at skriva um róðrarnar var minkaður burtur í einki, tí eingin spenningur var í seks av níggju róðrum. Skrivaði heldur ikki frá róðrunum á fjarðastevnu og vestanstevnu. Fyri okkum, sum skriva um ítrótt, er so strevið at skriva, tá tú veitst fyri dystin ella róðurin, hvør fer at vinna. Men klokkan 14.45 stakk tað upp á meg at finna fram myndatólið og í skundi fara oman Ískaini at vita, um tað millum annað eydnaðist Ingibjørg við gentum barnaróður at vinna meistaraheitið, og hvussu fór at gangast 8-mannaførunum og dreingjabátunum.

Hetta var góð avgerð at taka, tí løtan umborð á línuskipinum Sandshavinum, sum lá við Ískaiina, skuldi gerast serligt róðrarupplivilsi í brennandi sól. Læs resten →

Tilvildarlig prutl. Eingin sigur, at júst hesi prutlini eru ólóglig.

Bilatalið í Føroyum veksur við fúkandi ferð, men lítið hoyrist tó um nógv óhapp í hvørfall inni í Havnini. Orsøkin er uttan iva, at nú koyra so nógvir bilar í gøtunum, at møguleikin at koyra ov skjótt er minkaður munandi. Búgvi nær SMS, Gundadali og miðbýin, so tú merkir nógv til nógvu ferðsluna. Ikki tann stóri ampin av bilinunum ei heildur av stóru motorsúkklunum, har fólk heldur velja at koyra túrar millum bygdir. Læs resten →

Í 1966 mannaðu hesri garparnir Sílið: Aftst f.v: Øssur Simonsen, Høgni Larsen og Eyðun á Borg. Fremst f.v: Lutherus Hansen, Rúni Hentze, Jan Müller og Leivur Hansen. (Mynd Drekin)

Fyri 53 árum síðani stýrdi fyrrverandi blaðstjórin á Sosialinum og nú stjórin á oljan.fo , Jan Müller, 5-mannafarinum Sílinum. Longu á ungum árum birdist fjølmiðlahugin í dreingin, og skrivaði hann dagbók um ymiskt, sum hann tókst við. At skriva fekk hann við móðurmjólkini, tí pápin, Eiden Müller sáli, var kendur blaðmaður í Føroyum.   Læs resten →

FM-kappingin millum Argjabátin og Nevið Reyða er áhugaverd og spennandi at fylgja. Eitt av hæddarpunktunum í summar. Bátarnir vunnið tveir róðrar hvør, og her fer Argjabáturin fyrstur um málið í Fuglafirði. (Mynd Hvannrók)

Hesuferð fylgdi eg kappróðri á serliga hátt, tí jarðarferð og uppruddan darvaði. Tó so, hoyrdi brot úr onkrum róðri í bilinum, og á Tjarnagarði sá eg 10.mannaførini fara um málið. Spentur sum altíð, men segði vinmanni, at vit fingu kanska bara ein nýggja vinnara í Fuglafirði ella helst ongan. Tí eg visti, at eykarógvari sat umborð á Ingibjørg barnaróður við gentum, og at lot var undan. Ja, ein nýggjur vinnari frá seinast, og hetta gjørdist Hulda barnaróður við gentum, sum nú hevur vunnið tveir róðrar og Ingibjørg tveir róðrar. Tá tað er sagt, hevur man altíð onkrar tankar um føroyskan kappróður. Og fótutól mítt var til fleiri av róðrunum. Læs resten →

Busførarin segði mær, at bussar hava vánaligar umstøður í miðbýnum. Sjey parkeringspláss, so bussur kann standa har. (Mynd Vagnur)

Kom framvið á Skálatrøð í morgun og sá vakran útlendskan buss parkera á sjey parkeringsbásum. Bussførarin sat við róðri, og har vóru tvey onnur fólk í bussinum, sum vóru ferðaleiðari og kokkur. Gjørdist eitt sindur forvitin, tí hendingin var áhugaverd í kjalavørrinum at stóru mótmælunum um at byggja Tjóðpall á Skálatrøð og annars parkeringstrupulleikanum har á leiðini. Kom á tal við bussføraran og tveir sveisiskar ferðaleiðarar, og hetta skuldi gerast forkunnugt prát. Bussurin var ávegis úr Sveis til Íslands at koyra í eina viku. Bussførarin í morgun var føroyingur, tí útlendski bussførarin skuldi hvíla sambært sveisisku koyrureglunum.

Tey bjóðaðu mær at síggja bussin innann, sum kostar fýra milliónir at keypa í Sveis. 27 ferðafólk eru við á ferðini, og aftast í bussinum var lítil køkur, vs og pláss hjá børnum at fáa sær ein lúr. Ferðafólkini búðu á Sjómansheiminum dagarnar í Føroyum. Báðir ferðaleiðararnir, har annar eisini ansaði køkinum, øtaðust um ferðsluna og parkeringsmøguleikarnar í miðbýnum. – Var hetta í Sveis, so var gjørdur parkeringskjallari undir Skálatrøð, og Skálatrøð gjørd til vakra park. Men økið liggur so nær sjónum, so hetta er lættari sagt er gjørt, helt annar ferðaleiðarin, sum ivaðist um undirlendið. Blíð fólk má sigast og áhugaverd parkeringsmynd.  (Vagnur)

Argjabáturin vann tryggan róður á jóansøku. Mest vinnandi 8-mannafarið, sum róði fyrstu ferð á norðoyastevnu 1982. Hevur róð hvønn FM-róðurin síðani tá. Flaggskipið á Argjum, má sigast, sjálvt um felagið eigur 10-mannafarið Drekan Reyða. (Mynd Hvannrók)

Tá tú skrivar um kappróður og finst at, tá neyðugt er at finnast at, so verður tú av summum skýrdur grenj, men hetta rýnur ikki við meg. Mín áhugi er altíð rógvarin, sum skal hava rættvísa viðgerð og góðar umstøður. Jóansøkuróðurin leygardagin er prógv um, hvussu róðrar skulu avgreiðast. Genturróðurin byrjaði klokkan 15.00 stundisliga, og klokkutíðirnar passaðu til hvønn róður. Tveir tímar at avgreiða teir sjey róðrarnar. Frálíkar myndir og góð frásøgn. Tøkk øll somul bæði á sjógvi og landi fyri frálíkt avrik. Læs resten →

Í sólskinum seinnapartin gera teir Sjóriddaran kláran til fyrstu venjingina og róðurin á jóansøku. Vakurt 8-mannafar. (Mynd Vagnur)

Kom seinnapartin framvið í støðni á Argjum, har ungir menn gjørdu 8-mannafar klárt til jóansøkuróðurin. Gjørdist forvitin, tí higartil í summar hava vit bara sæð Nevið Reyða og Argjabátin. Áhugavert prát við ungu menninar, tí 8-mannafarið Sjóriddaran smíðaði Niclas í Koltri, sáli, í 1981, og Sjóriddarin róði seinasta róðurin á sundalagstevnuni ár 2000. So at hyggja í hagtalsskipanina, nær Sjóriddarin róði fyrsta róðurin, og hví ungu mennirnir hava valt sær gamlan bát, tí nógv nýggj 8-mannafør standa ómannað kring landið? Læs resten →

Vit eru á jóansøku í 2012, har Suðuroyingur fer fyrstur um málið. Tíverri rógva Klaksvíkingur og Vestmenningur ikki á jóansøku komandi, (Mynd Hvannrók)

Leygardagin í næstu viku er kappróður á jóansøku á Tvøroyri. Komi at hugsa um einaferð í 1980-árunum, tá undirritaði var umborð á Útvarpsbátinum saman við Jógvani Arge, einum teknikara og bátseigarunum. Stór uppliving at síggja kappróðurin á henda hátt, og myndirnar vóru frálíkar til grein um róðrarnar. Jógvan var úrmælingur við mikrofonini, og meg minnist, hvussu hann í myndatalu greiddi so væl frá róðrunum og gjørdi teir so spennandi. Tá var róð bæði 2000 metrar, 1500 metrar og 1000 metrar teinar. Sakni longru teinarnar. Bátarnir vóru nógv fleiri enn nú, og eingin var barnaróðurin. Havi til stuttleika kaga í hagtølini til tess at síggja, hvørjir bátar vunnu á jóansøku seinastu tíggju árini. Nógvir av bátinum rógva ikki í summar. Læs resten →

Dreingjaróðurin er altíð serligur og torførur at gita um. Nærmast Tjaldið, síðani Karin, Drekin, Heykur, Firvaldur, Royndin Fríða og Sílið. Um fjúrtan dagar fáa kanska aftur nýggjan vinnara.  (Mynd Hvannrók)

Havi skrivað um kappróðurin síðani 1980-árini og má bara staðfesta, at vit eru ikki komin víðari, hvat startinum viðvíkur. Sjálvandi kunnu vit einki gera við veður og vind, men vit stríðast framvegis við hanaføtur eins og vit gjørdu fyri tríati árum síðani. Vit hava ongantíð funnið røttu útgerðina og mannagongdina, so vit leggja føroyskan kappróður í betri karmar. Vit mistu tíma í Hvalvík og vit mistu fjøruti minuttir í Klaksvík. Ùr Hvalvík var sagt, at orsøkin var barnaróðurin, men hetta er bara partur av sannleikanum. Róðrarleiðari sigur mær í morgun, at fyrireikingin enn einaferð haltaði. Haldi at tað er ørkymlandi at geva veðri, vindi og barnaróðrinum skuldina, um tað er fyrireikingin, sum svíkur aftur og aftur.

Tá tað er sagt, og tími var farin, so gekk bara væl at avgreiða teir seinnu sjey róðrarnar, sjálvt um tað haltaði við boyunum inn á málinum, so rógvarar róðu alt ov nógv tøk, eftir at skotið var fallið. Sigi alt hetta, tí eg taka so hjartaliga synd í rógvarum, sum liggja á vágni út við tíma til tess at sleppa at rógva. Ítróttaliga virði er alt ov vánaligt. Vit onnur kunnu heima fara frá skíggjanum, kanska spæla á guitara eina løtu, leggja eina kabál ella loysa onkra krossorðagátu meðan vit bíða. Rógvarin og tess kroppur hevur í dagar fyrireikað seg til ávíst kllokkuslett at rógva. Og ikki at gloyma áskoðaran á bryggjuni og róðraráhugaðum kring landið. Gerist ørkymlaður og keddur so ofta at uppliva slíkt. Læs resten →

Størsti møguleikin er, at vit fáa nýggjan vinnara í dreingjaróðrinum.

Sundalagsstevnu er í morgin, og eg eri vísir í, at vit fáa ein ella tveir nýggjar vinnarar. Eru fyrstu róðrarnir áhugaverdir á norðoyastevnu, tá lutakast er um, hvar bátarnir liggja, so er enn meira áhugavert á næstu stevnu, tí tá liggja fremstu bátarnir borð um borð.

Kom í morgun at hugsa um, at eitt árið í 1980-árunum hendi tað, at bátarnir, sum vunnu á norðoyastevnu, ikki vunnu á næstu stevnu. Næsta stevnan var jóansøkan. So at leita í hagtølunum, jú, mín sann, at hetta var í 1987. Læs resten →