Handilin hjá Skæling og teimum var í neðra, og familjan búði í erva. Longri uppi sæst handilin hjá Knud Lambaa. (Mynd Anna Skæling)

Eftir pápabeiggan Vagn Erik Michelsen, sála, eru nógvar áhugaverdar myndir úr Havn, sum hava sína søgu. Tá eg sá myndina av vinkonunum Petru, konu Vagn Erik, og Annu Skæling, reikaðu tankarnir um smáu matvøruhandlarnar í Havn, sum í okkara barnaárum vóru í gomlu Havnini. Teir fingu allir mønustingin, tá fyrstu stóru sjálvtøkuhandlarnir sóu dagsins ljós seinast í 1960-árunum og fyrst í 1970-árunum. Smæran var fyrsti sjálvtøkuhandil í Havn. Síðani fækkaðust smáu matvøruhandlarnir skjótt. Í Sverrigøtu vóru tríggir matvøruhandlar, og ein var matvøruhandilin hjá Edith og Magnus Skæling, sum vit síggja á myndini ovast til høgru. Læs resten →

Myndin er frá 1944/45. Frá vinstru Vilhjálmur Mohr, Harald Reynagarð, Gunnar Johansen, Brynjer Gregoriussen og Kim Olsen. Myndin tikin í Gamla bókhandli. (Myndeigari: Fríði Gregoriussen)

Myndina omanfyri fekk eg í hondina frá einum soni Brynjer Gregoriusen, sála. Brynjer hevði myndina á borði sínum á Lágagarði, har hann búði seinastu árini. Sonurin segði mær, at talan var um reynadreingir, og at myndin var tikin í Gamla bókhandli. Gjørdist forvitin, tí vit kendust í fyrsta umfari bara við tveir dreingir á myndini, og hetta vóru Brynjer (1932-2016) og Kim Olsen (1931-1981). At finna upplýsingar um eldri myndir er áhugavert, tí í myndini eru mangan fleiri serligar søgur. Hesaferð gjørdist leitingarferðin drúgvari enn vanligt, tí tað gekk striltið at kennast við dreingin í miðjuni. Læs resten →

Rabarbugarðurin hjá ommu og abba fyri umleið 60 árum síðani. Frá vinstru Solvej við dóttrini Birgit. Solvej var systir Herborg konu Jógvan mammubeiggja mín.Síðan uttan iva ein arbeiðskona hjá ommu, sum vit halda eitur Irdi, og so eg sjálvur.

Í ár eru sjeyti og fýra ár liðin, síðani seinni heimsbardagi endaði. Eg eri føddur í 1949 fýra ára eftir, at ensku hermenninir fóru úr Føroyum. Pápi okkara segði okkum mangan frá árunum, tá ensku hermenninir vóru í Havn, og hetta havi eg skrivað um áður. Fyri kortum fylti Ellisheimið í Havn áttati ár, og eg var sum avvarðandi í hesum sambandi biðin at siga eitt sindur um Ellisheimið. Eg nevndi millum annað um grannarnar hjá Ellisheiminum, sum eg minnist sum smádrongur. Segði frá barakkunum, sum stóðu við Ellisheimið, og um dagarnar sá eg myndina omanfyri í myndabók hjá systkinabarni mínum. Áhugaverda myndin vakti beinanvegin góð barnaminni. Læs resten →

Aftur í 60 – árini 1996. Regin Jacobsen til vinstru og Jens av Reyni til høgru. (Mynd Vagnur)

Herfyri fór bakarin og tónleikarin Regin Jacobsen seinastu ferð um sýnuna 79 ár gamal. Regin og beiggjarnar Hannis, sála og Dia havi eg altíð kent, men ikki fyrr enn vit í Neistanum skipaðu fyri Aftur í 60 – árini í apríl mánað í 1988 og tjúgu ár fram, kom eg at kenna Regin enn betur. Regin var fyrikomandi og fittur maður, og meg minnist, tá hann lærdi til bakara hjá Conradi Skaale á horninum J.C.Svabosgøtu/V.U. Hammershaimbsgøtu. Læs resten →

Heitt er í sankutøðkassanum, sjálvt um kalt er í veðrinum. (Mynd Vagnur)

Fyri tjúgu árum síðani vóru vit við í átaki fyriskipað av Tórshavnar kommunu og Heilsufrøðiligu starvstovuni um at brúka alt lívrunnið húshaldsrusk til sankutøð.

Hetta var eitt norðurlendskt átak. Átakið er endað og frágreiðing skrivað, men vit og onnur í átakinum hildu fram at koyra alt lívrunnið húshaldsrusk í sankutøðkassan, og tað kemur ikki upp á tal at koyra matkent rusk í vanliga ruskposan. Læs resten →

6-mannaførini við monnum eru júst farin inn um Molan, við Hvessingi klárt á odda. Vit síggja eisini Gongurólv, Kollfirðing og Stráluna. Vøkur róðrarmynd, má sigast í brennandi sól. (Mynd Vagnur)

Ætlaði mær ikki oman á Ískaina at hyggja at kappróðri á ólavsøku, tí áhugin at skriva um róðrarnar var minkaður burtur í einki, tí eingin spenningur var í seks av níggju róðrum. Skrivaði heldur ikki frá róðrunum á fjarðastevnu og vestanstevnu. Fyri okkum, sum skriva um ítrótt, er so strevið at skriva, tá tú veitst fyri dystin ella róðurin, hvør fer at vinna. Men klokkan 14.45 stakk tað upp á meg at finna fram myndatólið og í skundi fara oman Ískaini at vita, um tað millum annað eydnaðist Ingibjørg við gentum barnaróður at vinna meistaraheitið, og hvussu fór at gangast 8-mannaførunum og dreingjabátunum.

Hetta var góð avgerð at taka, tí løtan umborð á línuskipinum Sandshavinum, sum lá við Ískaiina, skuldi gerast serligt róðrarupplivilsi í brennandi sól. Læs resten →

Tilvildarlig prutl. Eingin sigur, at júst hesi prutlini eru ólóglig.

Bilatalið í Føroyum veksur við fúkandi ferð, men lítið hoyrist tó um nógv óhapp í hvørfall inni í Havnini. Orsøkin er uttan iva, at nú koyra so nógvir bilar í gøtunum, at møguleikin at koyra ov skjótt er minkaður munandi. Búgvi nær SMS, Gundadali og miðbýin, so tú merkir nógv til nógvu ferðsluna. Ikki tann stóri ampin av bilinunum ei heildur av stóru motorsúkklunum, har fólk heldur velja at koyra túrar millum bygdir. Læs resten →

Í 1966 mannaðu hesri garparnir Sílið: Aftst f.v: Øssur Simonsen, Høgni Larsen og Eyðun á Borg. Fremst f.v: Lutherus Hansen, Rúni Hentze, Jan Müller og Leivur Hansen. (Mynd Drekin)

Fyri 53 árum síðani stýrdi fyrrverandi blaðstjórin á Sosialinum og nú stjórin á oljan.fo , Jan Müller, 5-mannafarinum Sílinum. Longu á ungum árum birdist fjølmiðlahugin í dreingin, og skrivaði hann dagbók um ymiskt, sum hann tókst við. At skriva fekk hann við móðurmjólkini, tí pápin, Eiden Müller sáli, var kendur blaðmaður í Føroyum.   Læs resten →

FM-kappingin millum Argjabátin og Nevið Reyða er áhugaverd og spennandi at fylgja. Eitt av hæddarpunktunum í summar. Bátarnir vunnið tveir róðrar hvør, og her fer Argjabáturin fyrstur um málið í Fuglafirði. (Mynd Hvannrók)

Hesuferð fylgdi eg kappróðri á serliga hátt, tí jarðarferð og uppruddan darvaði. Tó so, hoyrdi brot úr onkrum róðri í bilinum, og á Tjarnagarði sá eg 10.mannaførini fara um málið. Spentur sum altíð, men segði vinmanni, at vit fingu kanska bara ein nýggja vinnara í Fuglafirði ella helst ongan. Tí eg visti, at eykarógvari sat umborð á Ingibjørg barnaróður við gentum, og at lot var undan. Ja, ein nýggjur vinnari frá seinast, og hetta gjørdist Hulda barnaróður við gentum, sum nú hevur vunnið tveir róðrar og Ingibjørg tveir róðrar. Tá tað er sagt, hevur man altíð onkrar tankar um føroyskan kappróður. Og fótutól mítt var til fleiri av róðrunum. Læs resten →

Busførarin segði mær, at bussar hava vánaligar umstøður í miðbýnum. Sjey parkeringspláss, so bussur kann standa har. (Mynd Vagnur)

Kom framvið á Skálatrøð í morgun og sá vakran útlendskan buss parkera á sjey parkeringsbásum. Bussførarin sat við róðri, og har vóru tvey onnur fólk í bussinum, sum vóru ferðaleiðari og kokkur. Gjørdist eitt sindur forvitin, tí hendingin var áhugaverd í kjalavørrinum at stóru mótmælunum um at byggja Tjóðpall á Skálatrøð og annars parkeringstrupulleikanum har á leiðini. Kom á tal við bussføraran og tveir sveisiskar ferðaleiðarar, og hetta skuldi gerast forkunnugt prát. Bussurin var ávegis úr Sveis til Íslands at koyra í eina viku. Bussførarin í morgun var føroyingur, tí útlendski bussførarin skuldi hvíla sambært sveisisku koyrureglunum.

Tey bjóðaðu mær at síggja bussin innann, sum kostar fýra milliónir at keypa í Sveis. 27 ferðafólk eru við á ferðini, og aftast í bussinum var lítil køkur, vs og pláss hjá børnum at fáa sær ein lúr. Ferðafólkini búðu á Sjómansheiminum dagarnar í Føroyum. Báðir ferðaleiðararnir, har annar eisini ansaði køkinum, øtaðust um ferðsluna og parkeringsmøguleikarnar í miðbýnum. – Var hetta í Sveis, so var gjørdur parkeringskjallari undir Skálatrøð, og Skálatrøð gjørd til vakra park. Men økið liggur so nær sjónum, so hetta er lættari sagt er gjørt, helt annar ferðaleiðarin, sum ivaðist um undirlendið. Blíð fólk má sigast og áhugaverd parkeringsmynd.  (Vagnur)