Argjabáturin vann tryggan róður á jóansøku. Mest vinnandi 8-mannafarið, sum róði fyrstu ferð á norðoyastevnu 1982. Hevur róð hvønn FM-róðurin síðani tá. Flaggskipið á Argjum, má sigast, sjálvt um felagið eigur 10-mannafarið Drekan Reyða. (Mynd Hvannrók)

Tá tú skrivar um kappróður og finst at, tá neyðugt er at finnast at, so verður tú av summum skýrdur grenj, men hetta rýnur ikki við meg. Mín áhugi er altíð rógvarin, sum skal hava rættvísa viðgerð og góðar umstøður. Jóansøkuróðurin leygardagin er prógv um, hvussu róðrar skulu avgreiðast. Genturróðurin byrjaði klokkan 15.00 stundisliga, og klokkutíðirnar passaðu til hvønn róður. Tveir tímar at avgreiða teir sjey róðrarnar. Frálíkar myndir og góð frásøgn. Tøkk øll somul bæði á sjógvi og landi fyri frálíkt avrik. Læs resten →

Í sólskinum seinnapartin gera teir Sjóriddaran kláran til fyrstu venjingina og róðurin á jóansøku. Vakurt 8-mannafar. (Mynd Vagnur)

Kom seinnapartin framvið í støðni á Argjum, har ungir menn gjørdu 8-mannafar klárt til jóansøkuróðurin. Gjørdist forvitin, tí higartil í summar hava vit bara sæð Nevið Reyða og Argjabátin. Áhugavert prát við ungu menninar, tí 8-mannafarið Sjóriddaran smíðaði Niclas í Koltri, sáli, í 1981, og Sjóriddarin róði seinasta róðurin á sundalagstevnuni ár 2000. So at hyggja í hagtalsskipanina, nær Sjóriddarin róði fyrsta róðurin, og hví ungu mennirnir hava valt sær gamlan bát, tí nógv nýggj 8-mannafør standa ómannað kring landið? Læs resten →

Vit eru á jóansøku í 2012, har Suðuroyingur fer fyrstur um málið. Tíverri rógva Klaksvíkingur og Vestmenningur ikki á jóansøku komandi, (Mynd Hvannrók)

Leygardagin í næstu viku er kappróður á jóansøku á Tvøroyri. Komi at hugsa um einaferð í 1980-árunum, tá undirritaði var umborð á Útvarpsbátinum saman við Jógvani Arge, einum teknikara og bátseigarunum. Stór uppliving at síggja kappróðurin á henda hátt, og myndirnar vóru frálíkar til grein um róðrarnar. Jógvan var úrmælingur við mikrofonini, og meg minnist, hvussu hann í myndatalu greiddi so væl frá róðrunum og gjørdi teir so spennandi. Tá var róð bæði 2000 metrar, 1500 metrar og 1000 metrar teinar. Sakni longru teinarnar. Bátarnir vóru nógv fleiri enn nú, og eingin var barnaróðurin. Havi til stuttleika kaga í hagtølini til tess at síggja, hvørjir bátar vunnu á jóansøku seinastu tíggju árini. Nógvir av bátinum rógva ikki í summar. Læs resten →

Dreingjaróðurin er altíð serligur og torførur at gita um. Nærmast Tjaldið, síðani Karin, Drekin, Heykur, Firvaldur, Royndin Fríða og Sílið. Um fjúrtan dagar fáa kanska aftur nýggjan vinnara.  (Mynd Hvannrók)

Havi skrivað um kappróðurin síðani 1980-árini og má bara staðfesta, at vit eru ikki komin víðari, hvat startinum viðvíkur. Sjálvandi kunnu vit einki gera við veður og vind, men vit stríðast framvegis við hanaføtur eins og vit gjørdu fyri tríati árum síðani. Vit hava ongantíð funnið røttu útgerðina og mannagongdina, so vit leggja føroyskan kappróður í betri karmar. Vit mistu tíma í Hvalvík og vit mistu fjøruti minuttir í Klaksvík. Ùr Hvalvík var sagt, at orsøkin var barnaróðurin, men hetta er bara partur av sannleikanum. Róðrarleiðari sigur mær í morgun, at fyrireikingin enn einaferð haltaði. Haldi at tað er ørkymlandi at geva veðri, vindi og barnaróðrinum skuldina, um tað er fyrireikingin, sum svíkur aftur og aftur.

Tá tað er sagt, og tími var farin, so gekk bara væl at avgreiða teir seinnu sjey róðrarnar, sjálvt um tað haltaði við boyunum inn á málinum, so rógvarar róðu alt ov nógv tøk, eftir at skotið var fallið. Sigi alt hetta, tí eg taka so hjartaliga synd í rógvarum, sum liggja á vágni út við tíma til tess at sleppa at rógva. Ítróttaliga virði er alt ov vánaligt. Vit onnur kunnu heima fara frá skíggjanum, kanska spæla á guitara eina løtu, leggja eina kabál ella loysa onkra krossorðagátu meðan vit bíða. Rógvarin og tess kroppur hevur í dagar fyrireikað seg til ávíst kllokkuslett at rógva. Og ikki at gloyma áskoðaran á bryggjuni og róðraráhugaðum kring landið. Gerist ørkymlaður og keddur so ofta at uppliva slíkt. Læs resten →

Størsti møguleikin er, at vit fáa nýggjan vinnara í dreingjaróðrinum.

Sundalagsstevnu er í morgin, og eg eri vísir í, at vit fáa ein ella tveir nýggjar vinnarar. Eru fyrstu róðrarnir áhugaverdir á norðoyastevnu, tá lutakast er um, hvar bátarnir liggja, so er enn meira áhugavert á næstu stevnu, tí tá liggja fremstu bátarnir borð um borð.

Kom í morgun at hugsa um, at eitt árið í 1980-árunum hendi tað, at bátarnir, sum vunnu á norðoyastevnu, ikki vunnu á næstu stevnu. Næsta stevnan var jóansøkan. So at leita í hagtølunum, jú, mín sann, at hetta var í 1987. Læs resten →

Dreingjaróðurin tók okkum øll á bóli og var serligur, tí “favorittarnir” snávaðu. (Mynd Hvannrók)

Havi sjáldan áður sæð so góðar myndir, sum Kringvarpið borðreiddi við á norðoyastevnu. Eisini góðar nærmyndir, sum tey kunnu at gera enn meira burturúr. Frálíkar frásagnir frá Suna Merkistein og Ludvíki við Stein. Slíkt frálíkt róðrartilfar er ikki nógv at leggja aftrat hjá okkum øðrum. Tó so, nakrar fáar myndir og nakrar viðmerkingar millum annað, hví so fáir áskoðarar standa á bryggjuni og fylgja róðrunum.. Læs resten →

Tveir fyrikomandi sviar vóru til arbeiðis leygarkvøldið. Teir kendu einki til, hvussu leingi teir kundu borað. (Mynd Vagnur)

Klokkan var farin av átta leygarkvøldið, og vit í grannalagum vóru vitni til løgna hending, tí knappliga fór at larma illa. Hart ókent óljóð sum órógvaði húsfriðin. Nógv virksemi er her á leiðini yrkadagar um dagin, tí tey byggja nýggja løgreglustøð, SMS er stórur granni, og nógvar eru fyritøkurnar. Nógvir bilar og ólóglig prutl, men hetta er bara partur av vanliga gerandisdegnum, sum vit mugu liva við.

Um kvøldið er friðarligt tó óljóð frá onkrum kølimotori og ólógligum prutlum. Harða óljóðið leygarkvøldið kom frá borivogni, sum skuldi bora tveyhundrað metrar niður í jørðina, tí Vørnbygningurin skal hava jarðhita. Men hví bora seint á kvøldi beint undir vindeygunum hjá gomlum fólkum og barnafamiljum? Læs resten →

Á heimasíðuni hjá skótaliðnum SSB kom eg fram á áhugaverda mynd av eldri skótum, sum flestir eru farnir. Alt eldri havnardreingir, sum tú kennir allar. Hetta eru skótar, sum eru millum tíggju og tjúgu ár eldri enn tú sjálvur. Myndin er tikin í 1950-árunum og fragd at síggja, tí tú hevur so nógv góð minni um skótarnar. Ja, sjálvt gubbi mín Sverri Fon er á myndini. Var sjálvur SSB úlvaungi og seinni skóti í nøkur ár, áðrenn alt frítíðarlívið gjørdist hondbóltur. Eri nærmasti granni við skótahúsið, og tá tey brenna bál, leita tankarnar aftur til góðu árini í skótahúsinum.

Síggi, at Marius Rein hevur sett nøvn til myndina. Marius var sjálvur skóti í nógv ár. Skótarnir eru: Aftast f.v  Eyðun Johannesen, Sverri Fon, Heri Jensen og Harry Eysturtún. Í miðjuni: Thomas Arge, Sigmund Arge Gregoriussen, Øssur Debes og Finnur Olsen. Fremst: Magnus Sørensen, Birni Dam, Jógvan Ki Jacobsen, Niels Debes og Tórbjørn Michelsen. Myndin man verða frá páskalegu í Gøtudali miðskeiðis í 1950inum. (Vagnur)

Í 2014 fekk Argja Róðrarfelag nýtt 10-mannafar, og Drekin Reyði ger bart longu á norðoyastevnu. Klaksvíkingur nummar tvey, men hvørgin bátur rør á norðoyastevnu komandi. (Mynd Hvannrók)

Norðoyastevnan nærkast í hvørjum, og nógvar eru gitingarnar, hvussu fer at gangast hjá bátunum. Plagi at skriva, at eftir róðrarnar á norðoyastevnu fáa vit fyrstu ábendinginar, hvussu fer at gangast restina av róðrarárinum. Summir rógvarar eru fegnir, summir minni fegnir og aðrir vónbrotnir. Tó hava vit eisini fleiri dømi, hvussu nógv manningar kunnu mennast frá  norðoyastevnuróðrunum til ólavsøkuna. Ódnartøkini eru eisini ábendingar, men fleiri manningar rógva ikki ódnartøk. (Hvussu gekst nú á norðoyastevnu fyri fimm árum síðani í 2014. (Myndirnar eru frá 2014) Læs resten →

Starin kann tykjast svartur langt frá, men hann er litfagur

Hugaligt at geva starunum um veturin, tí teir eru skjótir í túninum, tá ið tú blakar breyðmolar og nakað av feittkendum út í tún. Í túnið koma eisini títtlingar og kvørkveggjur, og oman fyri sveima krákurnar. Føroyski starin er eitt slag fyri seg og er størri enn tildømis danski starin. Í hinum norðanlondunum rýma stararnir um heystið, okkara er her allan veturin. Føði teirra er mest maðkar, sniglar og annað smákykt. Í kava hava teir tað ringt, tá koma teir nærri húsum og taka til takkar við øllum í svongdini. Læs resten →