Vit síggja tunnilsmunnan vinstru megin í myndini. Tunnulin fer fyrst suðureftir, áðrenn hann fer um fjørðin. (Mynd Vagnur)

Sunnumorginin spákuðu vit av Kirkjabøarvegnum oman ferguleguna á Gomlurætt. Teistin var júst komin inn um grótkastið, og løtu seinni komu tjúgu bilar ímóti okkum ávegis til Havnar. Nógvur vindur av landssynningi og vakurt at síggja, hvussu væl Teistin skikkaði sær í aldunum og nógva vindinum í Hestfirði. Tankarnir reikaðu hesa løtuna, meðan vit komu longur oman ímóti ferguleguna. Vit eru nú so mikið gomul, at vit minnast stóra frambrotið, tá Gamlarætt var tikin í nýtslu 27. februar 1992, eftir at fólk úr Sandoynni og Hesti máttu við ”postbátinum” um Kirkjabønes. Sunnumorgunin var mangt áhugavert at sjá á Gomlurætt. Læs resten →

Ein ótrúliga vøkur og sigandi mynd. (Mynd Fornminnissavnið)

Myndin omanfyri er tikin fyrst í 1950-árunum, hetta sæst á Hotel Hafnia, sum Christian Dahl Restorff fór undir at byggja í 1950. Myndin er tikin úr “Amtmansgarðinum”, og tað áhugaverda við myndini, er, at eingin bilur sæst nakrastaðni. Lítið er broytt á Vaglinum, men síðani myndin varð tikin, er serliga Hotel Hafnia útbygt fleiri ferðir, millum annað varð ein hædd bygd aftrat í 1956. Ikki er løgið, at eingin bilur er at síggja, tí tildømis í 1955 vóru bara 582 bilar í Føroyum. Eg havi kagað eitt sindur í hagtølini. Læs resten →

Petur Michelsen og teir byrjaðu í 1949 at grava út fyri nýggjum sjómansheimi. (Myndeigari: Høgni Danielsen)

Vit eru stødd niðri í Vágsbotni um ár 1960. Myndina fekk eg frá Høgna Danielsen, sum er at síggja í myndini. Áhugaverda søguliga myndin hevur sína søgu. Um hetta mundið var Havnin brimpláss, tí Molin var ikki komin út í fulla longd, og tí hevði havaldan á lágættunum frítt spæl inn í Vágsbotn. Vit børn elskaðu at síggja aldurnar koma buldrandi, har vatnið kundi fara eftir gøtuni niðan um Sjómansheimið, sum ikki longur er sjómansheim, har serliga nógvir sjómansskúlanæmingar búðu. Tað var í 1949, at gomul dokrarahús vóru niðurtikin og nýtímans sjómansheim var bygt á staðnum. Petur Michelsen stóð fyri arbeiðinum, og 12. august 1956 var sjómansheimið vígt. Nógv annað áhugavert er at síggja á myndini. Læs resten →

Studenturin manning eftir vestanstevnu 1959. Aftast f.v: Arni Clementsen, Poul Stein Poulsen, Martin Rørsvig, Sørin Pram Sørensen og Gormur Justinussen. Miðan frá vinstru: Sigmund Arge Gregoriussen, Høgni Danielsen og Jógvan Højsted. Fremst f.v: Groth Nolsøe og Hans Jákup Ludvig. (Myndeigari: Høgni Danielsen)

Kom um dagarnar fram á áhugaverda mynd í bókini Havnini – fólk og yrki, har eg helt, at myndin og orðini ólavsøkan 1959 ikki passaði heilt saman. Róðursmaðurin við steypinum eitur Høgni Danielsen, sum eg kenni væl. Steypið og myndin kann ikki vera frá ólavsøku 1959, tí í bókini Drekin skrivar Niels Juul Arge, at Vestmenningur vann á ólavsøku í 1959 við Sumbingi nummar tvey og Studentinum nummar trý. Hetta mátti kannast nærri, og so út á Heygsvegin til Høgna Danielsen, sum 27. november komandi fyllir 80 ár. Læs resten →

Elinborg Trónd uttanst til vinstru. Kenni eisini Ebbu Winther nummar fýra frá vinstru. Nummar fýra frá høgru Gunnvør Debes og nummar tvey frá høgru Helena Dal- Christiansen gift Poulsen. Fremst vinstrumegin Helenu stendur systurin Hjørdis Patursson úr Kirkjubø. (Myndaeigari: Elsa Horn)

Tá eg herfyri vitjaði Elsu Horn í sambandi við hondbólt, gav hon mær nakrar smáar myndir av fimleikarum, sum á ólavsøku í seinnu helvt av 1940-árunum høvdu fimleikaframsýning á Eystaru bryggju í Havn. Áhuguvert at síggja, hvussu nógvir áskoðarar síggja framsýningina. Eg kenni fleiri fólk á myndunum, sum flestu eru farin. Í sambandi við myndirnar havi eg hitt nú skjótt 85 ára gamla Øssur Debes, sum var íðin og góður fimleikari. Og hann hevur nógv góð minni sum fimleikari: Læs resten →

Tað var tann tíð, tá Bacalao tók ímóti 12-15.000 tonsum af fiski um árið. (Mynd Vagnur)

Hoyrdi einaferð formannin í vinnumálum í Tórshavnar kommunu siga, at Saltsølan er ein sólskinssøga. Hesi orð kom eg at hugsa um, tá eg í bátinum herfyri sigldi inn í Vágsbotn. Saltssølan er vorðin  vakrari bygningur, og teir, sum arbeiða hjá Tórshavnar Havn, hava fingið nógv betri arbeiðsumstøður. Men sólsskinssøga er bygningurin ikki, heldur døpur søga um vinnur í høvuðsstaðnum, sum einaferð blómaðu á Vestaru bryggju. – Fiskasentralurin, Bacalao við flakavirki og góðsingarvirki, Saltsølan, Tunnuvirkið og aðrar smærri vinnur. Nú verður bygningurin brúktur til skúlastovur og saltsiloin til fyrilestarar, veitslur og annað.

Og tað var júst hetta, sum herfyri myndaði løgtingsvalið. Havnin við mest sum ongari fiskivinnu og nógvum almennen arbeiðsplássum, og útjaðarin, sum hýsir uppsjóvar – og alivinnuni. Havnin tapti valið, má sigast, og útjaðarin hevur tikið kvørkatak um Havnina. Vestmenningur løgmaður, sørvingur situr á pengakassanum og suðuroyingur á fiskivinnuni. Nú vantar bara, at runavíkingar ella klaksvíkingar vinna meistaraheitið í fótbólti. (Vagnur)

6. flokkur í Nonnuskúlanum 1964/65. Aftast frá vintru: Malena Enghamar, Minna Jacobsen, Tórun Andreasen, Svanna Hanusardóttir, Ása Poulsenog Jóhanna Debes. Í miðjuni frá vinstru: Asdrid Jacobsen, systi Maria og Rebekka Dragasund. Fremst frá vinstru: Britta Bendtsen, Súsanna Joensen, Martina Andreasen, Eydna Simonsen, Torgunn Thomsen, Sigun Lützen, Hildur Olsen, Laila Dam og Eva Kock

Nærmasti granni hjá okkum er Sankta Frans skúli av okkum kallaður Nonnuskúlin. Vit hoyra børnini í skúlagarðinum, og vit síggja einstakar nonnur spáka í grannalagnum, tó at tær nú eru fáar í tali. Tá tær vóru flest, vóru 24 nonnur. Myndina omanfyri fekk eg frá Hildur, sum er á myndini omanfyri. Myndin er frá 1964/65, og genturnar ganga í 6. flokki. Myndin er áhugaverd, tí tú kennir flestu andlitini, men flestu genturnar  er burtur í tínum dagliga hugaheimi. Nonnan “systir Maria” í vælkenda nonnubúnanum kenni eg væl aftur. Gekk sjálvur nøkur ár í Nonnuskúla. Søgan um Nonnuskúlan er áhugaverd. Læs resten →

Vælupplagdir sviar ávegis til landsdyst í Gundadali. (Mynd Vagnur)

Ert tú  knappur við myndatólinum, fáast góðar myndir uttan fyri hjá okkum. Í 1970 og 1980 árunum var mangan hugaligt at síggja hundraðtals suðuroyingar koma av Smyrli fram við okkum til dyst í Gundadali. Men nú eru suðuroyingarnir fáir, og klaksvíkingar fara nú gjøgnum tunlarnar til Havnar, men fá ár síðani, at teir leigaðu Smyril til Havnar. Tó so, vit hava framvegis stuðulsskrúðgonguna fyri teimum samkyndu, og tá Føroyar spæla altjóða landsdystir. Í gjárkvøldið komu nógvir vælupplagdir sviar framvið hjá okkum. Teir steðgaðu á, fóru niður at húka fyri síðani at veittra til okkum. Nakrir darlaðu eitt sindur aftanfyri, tí ov nógv av tí váta slagnum var innanborða. – Føroyar er vakurt land, rópti sviar.

Um fótbóltsdystin er stutt at siga, at alt ov lítil stríðsandi var at hóma á føroyska liðnum í fyrra hálvleiki. Okkara menn sýntist tamir, og tú sást tað á kropsmálinum á fleiri spælarum. Í seinna hálvleiki var frægari. (Vagnur) Læs resten →

Politiski valfepurin hevur nú lagt seg millum manna, men fólk eru tó spent, hvussu gongst at snikka saman samgongu. Veljarin hevur talað, og Bárður á Steig miðar eftir samgongu við seytjan tinglimum. Fara vit til løgtingsvalið næstseinast, so gjørdi Sambandsflokkurin tann brølara, at flokkurin fekk løgmann, meðan Fólkaflokkurin stýrdi Føroyum. Vestergaard fiskivinnuni og Niclasen pengakassanum, meðan løgmaður sum so einki vald hevði. Tí er spennandi næstu dagarnar, um Sambandsflokkurin enn einaferð leggur seg í fangið á Fólkaflokkinum. Ger hann tað, so fara vunnar atkvøður aftur at streyma úr flokkinum á næsta løgtingsvali. Læs resten →

Hilda og Johannes Michelsen.

Fekk myndina oman fyri frá einum trímenningi, sum býr í Danmark. Myndin er av abbabeiggja okkara Johannes Michelsen róptur Johannes í Dalaólastovu, sum var føddur 1883 og deyður 1943 trýss ára gamal. Konan æt Katrina Svanhilda Michelsen rópt Hilda fødd 1887 og deyð 1972. Fá kenna nú hesi fólk, tí abbabeiggin doyði jú í 1943.

Myndin sigur frá ymsum áhugaverdum, tí tey bæði áttu trý børn, sum vit kendu væl og minnast væl. Børnini vóru Johannes Michelsen róptur Lill, Petur Michelsen og Hanna, sum vit kendu væl. Pápi mín var systkinabarn við tey trý, tí abbi min Hans Jakku í Dalólastovu og Johannes á myndini vóru brøðir.

Løgin kensla at hugsa sær, at tú ongantíð hevur sæð Johannes og abba mín Hans Jakku í Dalaólastovu, tí teir doyðu báðir í 1943, og tú ert føddur í 1949. Kundi verið áhugavert at hitt teir, tí tað er so nógv, tú kundi spurt teir um. Tey vóru fýra systkin, og hini bæði vóru Maria Mikkelsen og Palli Michelsen.

Abbabeiggin Johannes í Dalólastovu var arbeiðsmaður og arbeiddi eisini í millumbilum sum lossingarmaður, men hann var eisini til skips serliga á yngri árum. Minnist væl konuna Hildu, henda fyrikomandi eldri konan í okkara dreingjaeygum, sum mangan kom á gátt hjá Amandu ommu, sum búði í Tórsgøtu. Johannes og Hilda búði í Tungugøtu. Læs resten →