Fótbóltsvøllurin kemur at liggja á veðurgóðum stað niðri í Hólma. (Vagnur)
Tá ið eg var á Eiði fyri viku síðani, tók eg mynd frá vegnum og oman í Hólma, har nýggjur fótbóltsvøllur skal gerast. Nakað av arbeiði skal gerast aftrat, so er klárt at leggja graslíki á økið. Ì fyrsta umfari verður bara vøllurin gjørdur, men við tíðini skal vøllurin lúka krøvini hjá Fótbótlssambandinum, so dystir í bestu deildini aftur kunnu spælast á Eiði. Eg havi altíð havt stóra virðing fyri eiðisfólki. Av Eiði verður sagt, at klárt verður næsta ár at spæla fótbólt á vøllinum.
Á Eiði er frálíka góð og væl hildin ítróttahøll. (Mynd Vagnur)
Nakað serligt er við Eiðis bygd. Tað tykist, sum samanhaldið er gott, serligur stríðsvilji er í bygdini, og soleiðis var eisini, tá ið vit spældu hondbólt og borðtennis í bygdini seinast í 1960 árunum og fyrst í 1970 árunum. Í Eiðis kommunu búgva í løtuni 675 fólk. 608 á Eiði, 27 í Ljósáum og 40 fólk í Svínáum. í bygdini er skúli, ítróttahøll, barnagarður og sambýli til eldri fólk. Nakað av virksemi er í bygdini, men nógv fólk fara av bygdini til arbeiðis í Eysturoynna og til Havnar. Bygdin minkar ikki, men heldur veksur, tí bygdin vaks við níggju fólkum frá desember 2012 til desember 2013.
Vakurt var seinasta leygardag at hyggja oman á Mølina. (Mynd Vagnur)
Tá ið fótbóltsfeløgini EB og Streymur løgdu saman á sinni, vóru fótbóltsdystir spældir bæði í Streymnesi og á Eiði, men Fótbóltssambandið kolldømdi vøllin á Mølini á Eiði, tí vøllurin leyk ikki krøvini, sum vallir skulu hava til dystir í bestu deildunum. Her er talan bæði um sjálvan vøllin, áskoðarapláss og skiftingarrúm. Men nú kunnu eiðisfólk gleða seg at fáa nýggjan fótbóltsvøll. Í seinasta lagi næsta ár, kann aftur spælast fótbóltur í bygdini.
Fótbóltsvøllurin á Eiði liggur á veðurgóðum plássi, og eingin ivi er um, at vit aftur fara at síggja fótbóltsspæl í bestu deildunum á Eiði. Eg haldi, at tað er ótrúliga væl klárað, at bygd við einans 675 fólkum kann byggja umframt skúla, barnagarð og sambýli, eisini kann byggja ítróttahøll og nú fótbóltsvøll. (Vagnur)