Nú ein dagin fekk eg tvær myndir sendandi úr Klaksvík, og tær vekja góð minni. Á myndunum eru fleiri kvinnur úr Stjørnuni, sum vóru kend hondbóltsandlit tá. Fleiri teirra spældu eisini á fyrsta føroyska hondbóltslandsliðnum.
Um tað mundið, tá ið myndirnar eru tiknar, fer føroyskur hondbóltur líðandi frá uttanduraspæli til innanduraspæl. Høllin í Klaksvík kom í 1968 og høllin í Havn í 1970. Liðmyndin er frá 1971. Hin myndin er óivað frá 1968, har Stjørnan vinnur steyp á ólavsøku. Tað er Henning Eysturoy, sáli, sum handar steypið á uttanduravøllinum í Gundadali.
Annars hava kvinnurnar úr Stjørnuni vunnið FM-heitið átta ferðir. Í 1945, 1977, 2000, 2004, 2006, 2007, 2008 og 2010. Á ovara myndini sæst undirritaði við longum hári. “Det var dengang”. Myndin er frá 1970 ella 1971, tí sambært ólavsøkuskránni, spældi Stjørnan ímóti Neistanum á ólavsøku hesi árini.
Henning Eysturoy, sáli, sum handar Stjørnuni ólavsøkusteypið var formaður í Neistanum seinast í 60 árunum og fyrst í 70 árunum. Vinmaður hansara Egin Slættanes, sáli, var tá kassameistari í Neistinaum. Kona Egin og kona Henning vóru systrar. Tað var ferð á Neistanum, tá ið teir báðir stýrdu felagnum. (Vagnur)
