Hetta er aðruferð, at Gongurólvur er tikin av hvirlu. (Mynd Vagnur)
Tað var tann tíð, tá allir kappróðrarbátar vóru koyrdir í lastbilum ella stórum vørubilum á stevnu. Men lætt var ikki altíð at fáa bilar, tí útvegaðu feløg sær hesar vognarnar. Trupulleikin er bara, at vognarnir eru lættir, og bátarnir á vognunum taka nógvan vind á seg. Er nógvur vindur og kanska hvirlur, eru bátarnir útsettir, tí hvirlan fær lætt tak í bátin. Og tað júst tað, sum hendi, tá Gongurólvur á veg til Havnar var komin til Oyrareingir í Kollafirði, tá hvirla tók Gongurólv út av vegnum. Gongurólvur er illa farin og verður neyvan gjørdur aftur. Bjarti Mohr koyrdi henda dagin Sílið og mátti seta upp á Kjalnesi. Og hann sigur:
Gongurólvur er illa farin og verður neyvna gjørdur aftur. (Mynd Vagnur)
– Bátarnir vóru at veg aftur til Havnar eftir Ódnartøkini í Runavík. Eg hevði Sílið upp á sleip, og tá eg kom á Kjalnes, hættaði eg mær ikki víðari, tí vindurin var so nógvur. Tað vóru hesar hvirlurnar, sum tóku í bilin og harvið eisini í bátin. Eg tók avgerðina og setti upp á Kjalnesi. Fór til bóndan, og vit bundu vognin við Sílinum á í ein bil hjá bóndanum. Sunnudagin var ein skái, og tá koyrdi eg Sílið til Havnar, sigur Bjarti í stuttari viðmerking.
Hetta er ikki fyrstu ferð, at kappróðrarbátur er tikin av hvirlu. Vit minnast, tá 6-mannafarið Lómur av Argjum fór í knús, tá báturin fór oman á vegnum. Gongurólur er tryggjaður og sýnaður at tryggingini, men enn er ikki endaliga gjørt av, hvat henda skal við bátinum. Sagt verður í Álakeri, at báturin er so mikið illa farin, at hann neyvan verður gjørdur aftur. Ein nýggjur bátur kostar við øllum einar 100.000 krónur.
Summar manningar eru hilnar uppat at koyra bátarnar á stevnu standandi á løttu vognunum. Bátarnir standa tryggari í einum vøru- ella lastbili. Eitt er vindur ella hvirlur, men bátarnir á vognunum kunnu eisini vera út fyri øðrum skaðum, tá teir standa á vognunum. Tí mugu feløgini umhugsa aðrar møguleikar at flyta bátarnar á stevnu. (Vagnur)