H71 má sigast at vera á finalukós eftir sigurin á Kyndli.

Avgerandi dystirnir seinastu fýra dagarnir gjørdist ikki rættiliga, sum eg gitti. Eg roknaði við, at vit máttu bíða til 29. mars at finna FM-finalistarnar í bæði bestu kvinnudeild og bestu mansdeild. At VÍF kvinnur taptu í Vági, samstundis sum skert kyndilslið óvæntað vann á Neistanum gjørdi, at Neistin og Kyndil spæla FM-finalurnar í apríl mánað. Vann mansliðið hjá Kyndli í dag, var Kyndil mest sum í FM-finalunum, men H71 vildi nakað annað. Mansdeildin er ikki endaliga avgjørd enn. Næsta sunnudagin spæla VÌF og Kyndil í Vestmanna og H71 og KÍF í Hoyvíkshøllini. H71 er í løtuni nærri FM-finalunum enn Kyndil.

Kyndil – H71 22 – 25 (12-17) Dómarar: Eyðun Samuelsen og Thomas J. Thomsen

Málskjúttar Kyndils: David Edvardsen 7, Julian Johansen 5, Ludvík Súnason 3, Hjalti Mohr Jacobsen 3, Finnar Hansson 1, Eirikur Simonsen 1, Frank Askildsen 1 og Hans Áki Dal Christiansen 1

Málskjúttar H71: Mark Causer Marcher 5, Pætur Thomsen 5, Hallur Biskopstø 5, Hans Kári Hansen 3, Helgi Hoydal 2, Rúni  Højgaard 2, Bogi G. Davidsen 2 og Sigmundur Nolsøe 1.

Heilt óvæntað legði H71 seg í dag longu á odda við fimm málum í hálvleikinum. Javnt gekk annars á frá byrjan, tí eftir níggju minuttir spæl var støðan 6-6 og eftir trettan minuttir 7-7. Men so gjørdi H71 veruligt hál og legði seg á odda 16-10 næstu tíggju minuttirnar. Hálvleikstøðan 17-12 til H71.

Í seinna hálvleiki skeyt Kyndil fimm mál fyrstu seks minuttirnar, og nú var støðam knappliga 17-17. Men so steðgaði upp hjá Kyndli, og H71 kom á odda 21-17 eftir fimtan minuttir spæl. Kyndil koma afturíaftur, og tá tríggir minuttir vóru eftir at spæla var H71 á odda 23-22. H71 vann dystin 25-22.

H71 er á FM-finalukós, men fyrst má VÍF vinna á Kyndil næsta sunnudag. Síðani má H71 vinna heimadystin ímóti KÍF, útidystin ímóti Team Klaksvík, og at enda heimadystin á StíF 4. apríl. Kyndil spælir sunnudagin ímóti VÍF í Vestmanna, og H71 spælir ímóti KÍF í Hoyvíkshøllini. Kyndil spælir seinasta dystin 4. apríl heima ímóti KÍF. H71 hevur nú nógv betri kort á hondini enn Kyndil um at náa FM-finalurnar, tí innanhýsisstigini kunnu eisini koma at telja. Her H71 betri, tí H71 hevur vunnið tríggjar av fýra dystum á Kyndli.

Men latið okkum nú bíða, hvussu leikur fer í næsta vikuskifti, tá VÍF og Kyndil spæla í Vestmanna, og H71 spælir ímóti KÍF í Hoyvíkshøllini. (Vagnur)

Viðmerkingar

viðmerkingar