Takk til øll tykkum, sum hava stuðlað mær hesi tvey árini og gleðiligar páskir. (Mynd Vagnur)
Nú eru tvey ár liðini, síðani eg fór undir nýggja heimasíðu við ymsum tilfari, sum ikki er at finna á øðrum heimasíðum og øðrum miðlum. Hesi tvey árini eru gingin ómetaliga skjótt, og eg havi tímað væl at skrivað tær 735 greinarnar, sum eru skrivaðar bæði árini. Undirtøkan gjørdist nógv størri, enn eg nakrantíð droymdi um. Og stóra undirtøkan er drívmegin, at eg tími at halda fram. Mest lisna greinin á heimasíðuni hesi tvey árini er søgum um Svein Rógva Nielsen, sum fekk blóðtøpp, tá vitjaðu 4855 fólk heimasíðuna í eitt døgn. Samrøðan við Marjuna Danberg er næst mest lisna greinin, sum 3833 fólk lósu fyrsta døgnið.
Vanliga vitja um 500-800 fólk heimasíðuna um døgnið, men beinanvegin okkurt serligt er á skránni, telir teljarin skjótt. Tildømis vitjaðu 1463 fólk heimasiðuna seinasta døgn, og herfyri, tá ið eg skrivaði nógv umrøddu greinina um óróið í KÍF, vitjaðu 2500 fólk heimasíðuna í hálvt døgn. Uttan góð heimildafólk hevði ikki borið til, og vil eg takka fyri hjálpina. Øll, eg vendi mær til, vilja úttala seg til heimasíðuna. Og hetta borgar fyri áliti. Eg kundi skrivað fleiri greinar um dagin, tí tilfar trýtur ikki, men heimasíðan skal bara vera mítt frítíðarítriv og ikki eitt arbeiði.
Enn einaferð takk fyri dygga stuðulin..
Longu frá ungum árum fekk eg áhuga at skriva um ítrótt á blaðnum 14. septembur. Hetta var gjørt í frítíðini fyrst í 80-árunum. Tá vóru ongar heimasíður ella sjónvarp, so fjølmiðlaverðin er ótrúliga nógv broytt í so máta.
Seinni kom eg at gerast blaðstjóri á ítróttablaðnum Alt um ítrótt, blað, sum kom út í tvey ár hvønn mánamorgun. Hetta var í 1985 og 1986. Fá ár seinni kom eg at gera ítróttasendingar í Sjónvarpi Føroya saman við Árna Gregersen og Leivi Hansen. Hetta var nýggj og spennandi verð.
Vit gjørdu fimm, seks sendingar, tá ið í fótbóltskappingin endaði um heystið og sendingar, tá ið vetrarítrótturin endaði um várið. Vit fóru eisini tá at senda beinleiðis frá landsdystum í flogbólti, svimjikappingum, landsdystum í fótbólti, steypakappingum í hondbólti og flogbólti. Eisini hevði Sjónvarp Føroya samsendingar við danskar og norskar sjónvarpsrásir, tá ið stórar altjóða kappingar vóru á skránni. Vit løgdu røddir til sendingarnar.
Umframt alt hetta skrivaði eg nógv hondbóltstilfar í dystarbløð hjá Neistanum og skrivaði nógv lesarabrøv í bløðunum. Tað var, sum allar mínar meiningar og hugskot skuldu festast á blað. Frá 2003 til og til við á ólavsøku 2008 skrivaði eg hundraðtals innsløg um kappróður á heimasíðuni hjá Havnar Róðrarfelag www.drekin.fo og næstan í trý ár skrivaði eg á heimasíðuni hjá Neistanum www.neistin.fo .
Alt hetta var spennandi og gevandi arbeiði, men eg føldi alla tíðina, at tað var alt ov avmarkað bara at skriva um ítrótt á heimasíðum. Tað er so nógv annað tilfar, sum tú kanst skriva um, og sum lesarin kann fáa gleði av. Bløðini og nógvu heimasíðurnar trola oftast á somu grunnum. Og vantar tilfar, so verður farið út um landoddarnar. Alt gott um tað.
Heimasíðan www.hvannrok.fo er mítt frítíðarítriv, nú eg eri farin frá sum lærari. Ætli mær ikki at binda meg til nakað sum helst, bara skriva av og á um tilfar, sum eg haldi er spennandi og hevur áhuga millum manna. Nýtt tilfar og finna fram okkurt áhugavert gamalt tilfar. Enn einaferð stóra tøkk fyri tykkara dygga stuðul og gleðiligar páskir. (Vagnur Michelsen)