Havnar Róðrarfelag egtur stórt og gott neyst í Álakeri. Ovara hædd er leigað út til stovn. (Mynd Vagnur)
Havnar Róðrarfelag fylti 80 ár 25. juni í ár, og í annaðkvøld 29. september er 80 ára veitsla í bátahøllini í neystinum. Havnar Róðrarfelag eigur nógvar kappróðrarbátar bæði nýggjar og eldri bátar. Nøvini vit kenna frá FM-róðrunum eru 10- mannafarið Havnarbáturin, 8-mannafarið Ørvur, 6-mannafarið Gongurólvur, 5-mannafarið Sílið, 5-mannafarið Drekin og 5-mannafarið Títlingur, sum bara verður brúktur til barnaróður. Felagið goymir eisini ein bát av hvørjari stødd, sum Niclas í Koltri smíðaði.
Kappróðrarsøgan í Føroyum er drúgv, tí longu í seinast í 1800 talinum varð róð kapp á ólavsøku. Hetta vóru ikki bygdir kappróðararbátar men 10-mannafør og 8-mannafør, sum vóru brúkt til útróður og flutning millum oyggjarnar. 25. juni 1932 byrjaði søgan hjá Havnar Róðrarfelag. Bygt varð neyst í Álakeri, har pláss var fyri 10-mannafari og 8-mannafari. Fyrst í 60 árunum var bygdur skúrur aftrat neystinum, so 5-mannafarið Sílið kundi standa har.
Í gamla neystinum stendur Havnarbáturin, sum Niclas í Koltri smíðaði. Eldri rógvarar eru um bátin. (Mynd Vagnur)
Niels Juul Arge, sum eitt skifti var formaður felagnum, skrivar í broti í bókini Drekin, at í 1935 kom drekahøvdið at gerast frámerkið hjá bátunum í felagnum. Niels Juul sigur soleiðis: “Víkingarnir hildu drekan ræða mótstøðumenninar.Tí høvdu teir hann fremst á stavninum, tá ið teir fóru í hernað. Jógvan í Skálum gjørdi drekan á Havnarbátin, hann bygdi í 1935. Tí hava vit enn drekan fremst á øllum okkara bátum. Tó ikki til at ræða teir, sum vit kappast ímóti, men sum eitt prýði.
Havnar Róðrarfelag kom at halda til í gamla neystinum til 8. novembur 1975, tá ið nýggja stásiliga neystið varð tikið í nýtslu. Seinni fekk núverandi neyst tvær lonir aftrat. Gamla neystið verður framvegis brúkt, tí har stendur stásiliga 10-mannafarið Havnarbáturin, sum Niclas í Koltri, sáli, bygdi felagnum í 1971. Eldri rógvarar hava umvælt bátin og fara væl um hann. Teir hava fleiri ferðir róð uttanlands á ymsum róðrarstevnum.
Her verður róð inn í Vágsbotn, men fyrst í 70 árunum bleiv Molin ov langur.
Felagið goymir ein bát av hvørjari stødd, sum Niclas í Koltri smíðaði felagnum, tí hesir bátar eru partur av søgu felagsins. Niclas í Koltri broytti føroyskan kappróður í 1957, tá ið hann smíðaði 8-mannafarið Miðvingin. Báturin var lættari og gekk skjótari enn aðrir bátar. Niclas gavst at smíða bátar í 1983.
Stór broyting fór aftur fram í føroyskum kappróðri í 1996, tá ið Sámal Hansen úr Runavík fór at smíða bátar, sum vóru enn lættari enn bátarnir hjá Niclasi í Koltri. Nú kundi bátarnir hjá Niclasi ikki brúkast longur, tí teir stóðu seg ikki í kappingini við nýggju bátarnar. Aðrir bátasmiðir hava eisini smíðað kappróðrarbátar.
Málið í Havn er bara 901 metur, og fyrst í 70 árunum varð ikki longur róð í Vágsbotn. (Mynd Vagnur)
Havnar Róðrarfelag eigur stórt og stásiligt neyst. Í neystinum stendur 5-mannafarið Títlingur, sum bara verður brúktur til barnaróður, 5-mannaførini Sílið og Drekin, 6-mannafarið Gongurólvur, 8-mannafarið Ørvur og tvey 10-mannafør. Havnarbáturin frá ár 2000 og nýggi Havnarbáturin, sum verður flotaður í næstum.
Eins og kappróður kring landið hevur Havnar Róðrarfelagið verið í lítlum aldudali seinastu trý árini, tí ikki er eydnast at manna Havnarbátin. Fólk í felagnum hava vón um bjarta framtíð, nú felagið fyllir 80 ár við vón um, at tað eydnast at manna nógvar bátar næsta ár. Til lukku við teimum 80 árunum. (Vagnur)
Havnarbáturin á ólavsøku í 2004. (Mynd Vagnur)
Drekin og Síðið við gentum í 2003. (Mynd Vagnur)