Gundadalur fyrst í 60 árunum. (Mynd Fornminnissavnið)

Omanfyri mynd er besta myndin av Gundadali, sum vit minnast, sum vóru ung í 60 árunum. Mangan hugsar tú, hvussu umstøðurnar hjá spælarum vóru tá samanborið við 2017. Á myndini síggja vit nærmast hondbóltsvøllin, sum Tórshavnar kommuna lat gera í 1945/1946. Vit spældu fyrstu árini á grúsi, men í sambandi við, at ÍSF fylti 25 ár 1964, varð vøllurin asfalteraður. Longri niðri við síðuna av fótbóltsvøllinum sæst annar hondbóltsvøllur, sum er fyrsti veruligi uttandura hondbóltsvøllur í Havn. Hondbóltsfelagið Neistin varð stovnað 21. mars 1931, og tá fóru neistaspælarar av Vaglinum niðan á fótbótsvøllin at spæla hondbólt. Nøkur ár seinni 1935/1936 varð hondbóltsvøllurin gjørdur, og hús bygt við vøllin. Læs resten →

Amanda omma er gentan fremst uttast til høgru. Vakrar vælklæddar ungar gentur fyrst í 1900-talinum.

Tá eg minnist aftur á ommu mína Amandu Dahl Michelsen, fødd Poulsen, síggi eg bara fyri mær eina mynd av eldri konu, sum hevði mist førleikan. Omma var fødd 23. oktober 1886 og doyði 23. desember í 1960. Tá var eg ellivu ára gamal. Sum 48 ára gomul fekk omma heilabløðing og lá uttan vit í fimm dagar. Tá hon vaknaði aftur, hevði hon mist førleikan. Hon gekk illa og hevði torført við at tosa. Nú eru vit so heppin, at ungdómsmyndir av ommu eru komnar undan kavi, sum Gunhild, eitt systkinabarn pápa okkara í Danmark lá inni við. Myndin omanfyri er ein av nógvum. Amanda omma er á myndini.. Læs resten →

VÍF liðið er í løtuni eitt betri lið, enn tað var seinasta heyst.

Tá eg mikukvøldið så kvinnudyst í sjónvarpi millum donsku kvinnuliðini Viborg og Odense Håndbold, kom eg í tankar um, at vit áttu at broytt endaspælið í bestu kvinnudeild, ja, kanska eisini í bestu mansdeild. Broytingin fer at broyta áhugan hjá kvinnunum at spæla hondbólt, landskappingin gerst meira spennandi, og vit varðveita spenningin longst møguligt. Serliga kvinnudeildin í Føroyum er viðbrekin, tí nógvar kvinnur vera við barn í kappingarárinum, og breiddin er lítil og stendur og fellur við heilt fáum spælarum. Tá so skaðar eisini minka um spælarahópin, so fánar mangan landskappingin burtur í einki seinna hálvár. í nógvar mánaðir bíða vit eftir FM-finaludystunum, og fleiri av dystin seinna hálvár hava lítið og einki at siga, tí eingir dystir eru um niðurflyting og FM-finaluliðini longu funnin. Læs resten →

Ómetaliga góð mynd tikin í gamla Kyndilshúsinum. (Mynd Djóni Andreasen)

Tá ið eg kom fram á myndina omanfyri í bókini hjá Birgari, sum er tikin í gamla Kyndilshúsinum í 1967, kom eg at hugsa um Kára Petersen eisini nevndur Kári P. Evnaríkur tónleikari og sangari, ja, ein av okkara allar bestu. Sangirnir hjá Kára P. koma at standa í allara ævir, tí allir siga teir fólki so nógv og eru mangan tíðarleysir. Teir tríggir á myndini Kári Petersen, Eirikur Rasmussen og Dánjal Jákup Højgaard stovnaðu bólkin “Mystic Eyes” í 1967, men bólkurin gavst longu í 1968. Læs resten →

Unglingalið Neistans 1966. Aftast f.v: FinnBjørn Guttesen, Sverri Wang, Kristjan á Neystabø, Sverri Durhuus, steypagevari, Tønnis Wardum og Steinbjørn Slættanes. Húkandi f.v: Vagnur Michelsen, Echardt Persson, Kristjan Samuelsen og Haraldur Kjeld.

Unglingaliðið hjá Neistanum var í 1966 boðið til steypadyst í Vestmanna. VÍF og Neistin vóru jøvn lið, og vit høvdu trupulleikar at vinna í Vestmanna, sjálvt um vit vunnu FM-heitið hetta árið. Mín góði hondbóltsvinur Sverri Durhuus var serligur áskoðari, tí hann mest sum gekk ov høgt upp í hondbóltsspælið sum áskoðari. Hann var vísir í, at steypið, sum hann hevði keypt til dystin, fór VÍF at vinna. VÍF vóru favorittar at vinna steypið. Men við seinasta bríksl lógu vit tvey mál omaná. Steypið skuldi nú handast okkum, men har var einki steyp, tí Sverri var rýmdur heim í bygdina við steypinum. Hann var keddur, tí VÍF ikki vann dystin og harvið steypið. Alt spældi tó væl av, tí Sverri kom aftur við steypinum, sum varð handað okkum. Sverri var ikki sørt errin, tá ið hann bleiv avmyndaður saman við neistaspælarunum. Tað regnaði henda dagin. (Vagnur)

Vit mugu fáa onnur lið enn Kyndil og Neistan at bjóða av um meistaraheitið.

Tá eg í gjárkvøldið sá, at kyndilskvinnur høvdu vunnið 41-11 á StíF, gjørdist eg keddur. Gjørdist eisini eitt sindur hondbóltskeddur, tá eg fyri trimum vikum síðani sá, at kyndilskvinnur høvdu vunnið 37-25 á VB. Var keddur vegna spenningin í bestu kvinnudeild, og at so stórur munur er á kvinnuliðunum. Ikki haldi eg, at hvørki Kyndil ella Neistin eru so góð lið, at tey eiga at kunna vinna so stórar sigrar á hinum liðunum. Spell fyri kvinnukappingina og spell fyri spenningin í deildini. Spenningurin er so mikið lítil, at vit longu eftir fyrsta umfar í grundspælinum seinasta heyst kundu spælt FM-finaludystirnar millum Kyndil og Neistan. Ikki hugaligt.  Læs resten →

Westward Ho og Havnar Róðrarfelag á jóansøku í 2007. (Mynd Christopher)

Westward Ho er bygd í Grimsby í 1884. Sluppin varð keypt til Føroya í 1895 og var heimahoyrandi á Tvøroyri. Sluppin fekk ikki motor fyrr enn í 1920. Í 1966 keypti sluppgrunnur í Havn sluppina, og tá kom eg at kenna væl til sluppina, tí mammubeiggi mín Debes Christiansen var ein av teimum, sum tók stig til sluppgrunnin. Minnist, tá ið sluppin fyrstu ferð uttan motor skuldi sigla til Danmarkar. Stórur áhugi var millum manna at fylgja ferðini. Men fyrstu dagarnar var stilli, og sluppin lá eystan fyri Nólsoynna og bíðaði eftir vindi. Men sluppin kom loksins til Danmarkar. Í dag eigur Tórshavnar kommuna sluppina. Í 2007 vóru Havnar róðrarfelag við sluppini á jóansøku á Tvøroyri, og vit síggja HR flaggið í mastrini. (Vagnur)

Vit skulu gloyma alt um nýggjan flogvøll á Glyvursnesi.

Løgið, at fólk tíma at brúka orku at kjakast um nýggjan altjóða flogvøll á Glyvursnesi, tí hvørki í mínari tíð ella næstu hálvthundrað árini kemur flogvøllur á Glyvursnesi. Grundgevingarnar eru nógvar. Í góðu tíðunum í Føroyum í løtuni hava summi fólk fingið veinjir og halda, at trøini vaksa inn í himmalin. Alt skal gerast størri, vit mugu fáa fleiri ferðafólk til Føroya, og vit mugu leingja flogvøllin í Vágum, sjálvt um vit júst hava longt vøllin og útvega nýggj stór flogfør. Fólkini eru ongantið nøgd. Sum búgvandi í Havn ynki eg ikki flogvøll á Glyvursnesi. Vit sleppa undan larminum frá flogførunum, og tað tekur bara fjøruti minuttir at koyra vestur í Vágar, og tveir tímar seinni ert tú í Keypmannahavn. Kanst tú krevja meira. Sjálvandi ikki. Læs resten →

Neistin dreingir 1964. Aftast f.v: Niels Símun Johannesen, FinnBjørn Guttesen, Jógvan Martin Mørk, Tummas Joensen og Tønnis Wardum. Húkandi f.v: Kristjan á Neystabø, Echardt Persson, Bjarni Samuelsen, Eyðfinn Lamhauge og Sverri Wang.

Í 1963 varð fyrstu ferð kappast um FM-heitið í dreingjadeildini og gentudeildini. VÍF vann fyrsta FM-heitið fyri dreingir, meðan Neistin vann fyrsta FM-heitið fyri gentur. Neistahúsið varð bygt í 1963/64, og tá kom verulig ferð á ungdómsarbeiðið í Neistanum. Og longu í 1964 bar hetta ávøkst, tí bæði genturnar og dreingirnir hjá Neistanum vunnu FM-heitið. Og tað var í 1964, at bæði liðini fóru tríggjar vikur langa hondbóltsferð til Noregs. Myndin omanfyri av dreingjaliðnum er tikin í Noregi. Sum tit síggja, komu nógvir av dreingjaliðsspælarunum at manna besta liðið hjá felagnum nøkur ár seinni. Børn hjá tveimum av spælaranum eiga børn sum spæla ella hava spælt á bestu liðunum hjá felagnum. Vanligt var í 1964, at dreingir høvdu brylcreme í hárinum. Ein teirra segði undirritaða, at tað ráddi um, at hárið sat væl, tí nógvar norskar gentur stóðu mangan og eygleiddu føroysku dreingirnar, tá ið teir spældu dyst. (Vagnur)

Petur Hammer við FM-steypinum í 1977.

So langt eg kann minnast sum smádrongur, vann besta manslið hjá TB einki FM-heiti í bestu fótbóltsdeildini. TB vann FM-heitið í 1951, men so vann TB ikki FM-heitið aftur fyrr enn í 1976. TB vann FM-heitið í 1976, 1977 og 1980, og TB liðið var eitt so væl spælandi lið, sum fólk enn tosa um. Øll hesi 25 árini vóru tað serliga KÍ og HB, sum vunnu FM-heitið, men í 1959 og 1962 vann B36 FM-heitið. Í einum myndablaði sá er omanfyri lýsingina frá Restorffs bryggjarí. Og lýsingin boðar frá nógvum góðum. Læs resten →