Landsliðið í 1977. St.f.v: Finnur Helmsdal, Sigmund Reinert, Bjarni Samuelsen, Mortan Mørk, Hanus Joensen, Finn Bærentsen, Áki Mortensen, Hilmar Joensen og Hans Mortensen, venjari. Húkandi f.v. Palli Joensen, Hans Åge Stampe, Sverri Jacobsen, Echardt Persson og Áki Davidsen.

Hans Mortensen vandi føroyska manslandsliðið í 70-árunum, tá millum annað Føroyar í 1976 fingu góð úrslit í HM-kappingini í C bólkinum í Portugal. Føroyar tapti 21-20 fyri Sveits í hesi kapping. Fýra av spælarunum á myndini eru ikki millum okkum longur. Sigmund Reinert, sum doyði ungur, og Finnur Helmsdal, sum doyði av sjúku í 2008. Síðani eru seinni Sverri Jacobsen og Finn Bærentsen eisini farnir. Hans Mortensen legði stóran dent at fáa donsk 1. deildarlið at koma til Føroya at spæla ímóti føroyska landsliðnum. Kolding IF var eitt av liðunum. Í 1980 skipaði Føroyar fyri HM-kappingini í C-bólkinum, og tá spældu Norra, Portugal og Eysturíki eisini í C-bólkinum. Tann 6. februar 1980 tapti Føroyar 17-24 fyri Norra í høllini í Klaksvík. Í 2019 er Norra eitt av bestu liðunum í heiminum og spældi finaludyst ímóti dønum í seinastu HM-kapping. (Vagnur)

Sum vit síggja, so er Svartfoss minni bingjuskip enn vanligu skipini, sum vit síggja á Molanum. (Mynd Vagnur)

Havi ikki áður sæð hetta skip á Havnini, men eg síggi í tíðindaskrivi frá 21. januar 2019, at Eimskip sigur, at krøvini eru vorðin nógv størri at flyta feskan fisk úr Føroyum bæði tá talan er um laks, botnfisk og uppisjóvarfisk. Tí setir Eimskip einaferð um vikuna køli og frytiskipið Svartfoss í sigling millum Føroyar og Bretland og Føroyar og Háland. Svartfoss er nógv minni bingjuskip enn vanligu farmaskipini, sum vit síggja á Molanum. Uttan iva siglir Svartfoss nógv skjótari enn stóru fraktskipini (Vagnur)

Nakrir av SSB skótunum á ferðini í 1968. Frá vinstru Børge Barslay Hansen, Helgi Joensen, Per á Lava Olsen, Kjartan Mohr, Palli Askham, Karl Johan Mortensen og Snæbjørn í Dali.

Altíð hugaligt at síggja eldri svarthvítar myndir. Myndina omanfyri fekk eg frá Gunnari Mohr, og tað er við sorgblídni at síggja beiggjan Kjartan Mohr, sála, á myndini. Ófatligt, at hesin fyrikomandi og fitti maðurin ikki er millum okkum longur. Torbjørn beiggi mín var við á ferðini og eisini Bjarti systkinabarn Kjartan. Ætlanin var, at bara fýra gulir skótar skuldu á hesa legu, men endin gjørdist, at talið nærkaðist teimum fjøruti skótunum. Læs resten →

Teir grava út fyri nýggjari fimleikahøll til Havnar Fimleikafelag. Spell, at søguligu húsini á Trøðni máttu lúta. Húsini stóðu upprunaliga á Reyni, men vóru flutt út á Trøðna 1835/36. (Mynd Anna Mohr)

Áhugaverdu myndina omanfyri, sum eg herfyri fekk frá Gunnari Mohr, hevur mamman Anna Mohr tikið á sumri 1973. Vit eru stødd á Stórheyggi ella sum vit róptu á Heygnum. Lætt er annars at tíðarfesta myndina, tí gravmaskina er júst farin at grava út fyri nýggjari fimleikahøll til Havnar Fimleikafelag. Fimleikafelagið, sum var stovnað 9. desember 1909, hevur serliga søgu og var hjartabarn hjá havnarfólki. Nógv áhugavert er at síggja á myndini, men fyrst nøkur orð um traðirnar og nøkur av húsunum á myndini. Læs resten →

Fólkafundur á Doktaragrund á ólavsøku 1955. Myndina tók Fríðhild Gregoriussen úr vindeyganum í húsunum hjá verforeldrunum.

Allar myndir siga frá søgu eisini myndin omanfyri, sum Fríðhild Gregoriussen tók á ólavsøku 1955. Fríðhild, sála, ættað úr Hvalba var kona Brynjer Gregoriussen, sum vit kendu sum el-mann og fótbótbóltsspælara í HB. Brynjer var sonur Grækaris Gregoriussen úr Havn og Ellu av Sandi. Tá Brynjer og Fríðhild giftust, búðu tey fyrstu árini á Reyni hjá Grækarisi og Ellu. Myndin er tikin úr vindeyganum niðan á Doktaragrund. Læs resten →

Bringubrattir dreingir í Mylluhylinum. Frá vinstru Bjarni Samuelsen, Helgi Nolsøe og Jan Müller.  (Mynd Vagnur)

Myndin omanfyri hevur eingin av tykkum sæð áður, tí hana havi eg funnið í gamlari myndabók hjá mær, sum eg slett ikki visti var til. Um tólv ára gamal fekk eg myndatól, sum tók svart/hvítar myndir, har myndirnar ikki vóru størri enn 6×6 sentimetrar. Á myndini síggja vit fýra dreingir, sum eru við Sandá, har dreingirnir í svimjibuksum hava svomið í “Mylluhylinum”, sum vit síggja mynd av niðanfyri. Dreingirnir í svimjibuksum, sum búðu við Landavegin, eru frá vinstru Bjarni Samuelsen, Helgi Nolsøe og Jan Müller. Áskoðarin á steininum er Mikkjal Müller beiggi Jan. Læs resten →

Durita og VÌF hava beina kós í FM-finalurnar.

Fyrst í hesi greinini skal rós berast oman í Miðlahúsið til dygdararbeiðið FM1 ger fyri føroyskan hondbólt, eins og FM1 ger fyri fótbóltin og flogbóltin. Í hondbólti eru FM1 altíð á staðnum við góðum frásagnum frá Sjúrði Hoydal, Tróndi Arge og Hilmar Jan Hansen. Og á brúnni situr Heri Simonsen og savnar træðrirnar við práti og støðum. Frálíkt fyri okkum, sum nú sita á síðulinjuni og fylgja hondbóltinum. Niðanfyri nakrar hugleiðingar um nýggja kappingarleistin hjá mansliðnum í bestu deildini og kvinnudeildini, sum spælir eftir gamla leistinum. Spennandi, hvørji lið spæla FM-finalurnar í apríl mánað. Læs resten →

S/S Oyrnafall (S/S Ceuta) var bygt í 1929 í Hamburg og søkt í Rotherdam í 1943 av breskum flogførum. Skipið var síðani flotað aftur og kom á danskar hendur, áðrenn føroyingar yvirtóku skipið.

2013 gav Heðin Samuelsen, sáli, forvitnisliga bók út um løgtingsskipið S/S Oyrnafjall, sum gerst ogn føroyinga á heysti 1947, til tað verður selt aftur upp undir jól í 1955. Ætlanin við skipinum var, at føroyingar skulu fáa part í farmasiglingini úti í heimi. Føroya Løgting spenti bogan ógvuliga nógv til tess at hava skipið siglandi, tí farmagjøldini sveiggjaðu so nógv. Summar tíðir var inntøkan góð, men aðrar tíðir sigldi skipið við undirskoti. Áhugavert at síggja, hvussu leingi menninir mynstraðu umborð. Vanliga hálvt annað ár, men tá torført var at útvega maskinmenn, skulu vit niðanfyri hoyra um maskinmeistara, sum var umborð í fýra ár. Læs resten →

Friðsælt og eingir bilar í Havn fyri meira enn hundrað árunum síðani. Tá gramdu fólk seg ikki um óljóð úr øllum ættum, sum darvaði svøvninum. (Mynd: Havnin – fólk og yrki)

Tá tú sært vøkru myndina omanfyri, kemur tú at hugsa um, hvørjar varðveitingartankar kommunan hevði, tá myndin var tikin fyri meira enn hundrað árum síðani. Vøkur mynd við nógvum trøum og laðaðum grótgarðum. Løgið at hugsa sær, at 1865 fekk Havnin fyrsta hylin, sum ætlaður var til drekkivatn. Við brúnna á Vaglinum, sum gekk yvir í Tinghúsvegin, varð ein byrging gjørd um Havnará. Í nógv ár var hesin hylurin einasta stað, har havnarborgarar við byttu og spann kundu fara eftir reinum vatni. Tað fylgdu strangar fyriskipanir við, at hylurin skuldi haldast reinur. Myndin er tikin í 1896.

Torført var sjálvandi at steðga menningini av Havnini, men gongur tú niðri í býnum, so var skilið mangan lítið, tá byggiloyvini vóru givin til nógvu betongkassarnar, sum serliga vóru bygdir í 1950- og 1960-árunum. Guð viti, hvat býarpolitikarar tá hava hugsað um at varðveita og um vakurleika. Komi at hugsa um fólkini á myndini, sum í friði kunnu spáka í gøtunum. Einki óljóð, eingin óhumska frá píkum og salti blandað við asfalti. Rein luft. Fantastiskt at hugsa sær. (Vagnur)

Áhugaverd mynd Yviri við Strond. Spell, at vit ikki hava varðveitt bara eitt av fleiri fiskastykkjum í Havn. (Mynd Havnin – fólk og yrki)

Myndin omanfyri er ógvuliga áhugaverd, tí hon sigur frá tíðini, tá nógv havnarfólk arbeiddu í fisk. Elstu virkini eg minnist, sum turkaðu fisk, vóru tey úti í Hvannasundi við Heygsvegin og fiskavirkið hjá Carl á Lag Yvir við Strond. Hesi fiskavirki vóru serlig, tí tú sást enn minnini, tá tey turkaðu fisk uttandura. Vaskaði saltfiskurin var lagdur á steinsett fiskastykki, sum var tilhøgdum steinum vóru lagdir á serligan hátt. Sólin hitaði bæði steinar og fiskin, so hann tornaði skjótt, tá sjálvandi veðrið var til vildar.

Ja, so skuldi berast skjótt at, um hann øtlaði veðrið, og fiskurin í skundi skuldi savnast saman í stakkar at bíða eftir frægari veðri. Minnis væl fiskavirkið hjá Carl á Lag, sum var tikið niður í 1968. Alt hevur sína tíð, tí fiskavirkini fóra frá at turka fisk uttandura, men heldur fingu sær turkiikanalur innandura, har fiskurin var lagdur á rimavognar og síðan koyrdir inn í serligu turkikanalirnar. Havi sjálvur sum unglingi arbeitt fisk á henda hátt úti Hvannasundi. (Vagnur)