Gjørdi nýggja samgongan rætt, so eigur hjúnabandslógin at vera broytt beinanvegin. Tí so sleppa vit í framtíðini undan kravgongum og óneyðugum kjaki um tey samkyndu. Tíðin er við teimum samkyndu, og tá øll norðunlondini og eisini Obama í USA hevur gingið teimum samkyndu á møti, so verður hetta eisini gjørt í Føroyum fyrr ella seinni. Ì míni verð er hetta bara ein avgreiðsluspurningur, tí meirlutin av føroyingum vilja jú hava broytt hjúnabandslógina. Nógv rumbul stóðs á sinni um grein 266 b, nú tosar eingin um hetta. Soleiðis gerst eisini við hjúnabandslógin. Annars var hjúnabandslógin misnýtt í valstríðnum.

Eg hoyrdi fleiri ferð fólk siga í valstríðnum, at nú var hjúnabandslógin í vandi. Hetta er púra burturvið, tí eitt hjúnaband er eitt samband millum tvey fólk, sum samfelagið annars onga ávirkan hevur á. Tey ungu fara antin á kommunukontór, kirkju ella onkra aðrastaðni at gera avtalu og lova hvør øðrum, at tey ganga sama í hjúnaband og halda saman bæði í viðgongd og mótgongd. At so 40% av teimum skiljast seinni á lívsleiðini, er heilt annað mál.

Danmark var fyrsta landið heiminum, sum gjørdi lógina skrásett parlag. Hetta var í 1989. Lógin gav sama rætt sum hjúnaband undantikið ættleiðing og foreldramyndugleika. Í 2012 ger Fólkatingið nýggja lóg, har samkynd kunnu vígast á jøvnum føti við onnur. Lógin skrásett parlag verður tá avtikin, so í Danmark er bara ein lóg, og einki eitur longur skrásett parlag.

Um vit vilja tað ella ei, so nyttar einki at stríðast ímóti at broyta hjúnabandslógina í Føroyum, tí vit vita, at føroyingar fyrr ella seinni mugu broyta lógina eins og er gjørt í øðrum londum. Tíðin krevur hetta. Tí vóni eg, at nýggja samgongan ger skjótt av, og fær broytt lógini.

Hoyri nøkur fólk siga, at tey eru ikki ímóti, at hjúnabandslógin verður broytt, men tey vilja ikki, at tey samkyndu verða vígd í kirkju. Hetta er heldur ikki neyðugt, tí tey samkyndu hava boðað frá, at giftast í kirkju er ikki avgerandi fyri tey. Tað avgerandi er, at tey fáa somu juridisku rættindi í Føroyum eins og aðrir borgarar. Tey ungu á myndini omanfyri er vígd í kirkju. Konan er úr Vestmanna og maðurin úr Havn. Eg havi fingið loyvi at brúka myndina í sambandi við greinina. Góð og sigandi mynd og til lukku við hjúnabandinum.  (Vagnur)