Jacklin spældi ótrúliga væl ímóti VB. (Mynd Álvur)

VB var uppi í “hondbóltshimmalinum” í steypadystinum ímóti Stjørnuni, men seinnapartin var ikki so nógv um kvinnurnar úr Vági. Neistin vann greiðan sigur, sjálvt um neistavenjararnir summa løtur høvdu mest sum alla stammuna á beinkinum.

Vit sóu eitt tamt VB lið. Tó so, dysturin var hampuliga javnur fyrstu tíggju minuttirnar, tá støðan var 7-4 til Neistan. Men Neistin dró meira frá, og eftir tjúgu minuttir hevði Neistin 14-9 leiðslu, og hálvleikstøðan var 16-13 til Neistan.

VB heldur tørn fyrstu minuttirnar í seinna hálvleiki, men so dregur Neistin veruliga frá. Tíggju minuttir spældir 22-17 til Neistan, tjúgu minuttir spældir 29-20, og løtu seinna 32-20.

Neistin vinnur dystin 33-24.  Una Egilsdóttir, sum var toppskjútti hjá VB í steypadystinum, spældi ikki í dag, men ein ung Una Nolsøe, skeyt fimm mál fyri VB. Jacklin Durhuus hjá Neistanum, sum vit ikki hava sæð so nógv til í eina tíð, spældi frálíkan dyst seinnapartan, ja, hon spældi besta dystin á vetrinum.

So spurningurin, um VB megnar at gera nakað við neistakvinnur í steypafinaluni, men steypafinala er serligur dystur. Tá koma VB kvinnur úthvíldar til Havnar, og Una Egilsdóttir kemur úr Danmark. Vit fáa ein heilt annan dyst, enn vit sóu seinnapartin í dag. (Vagnur)

Málskjúttar Neistins: Barbara Brauer 10, Jacklin Durhuus 8, Nicoleta R. Hansen 5, Bára Hansen 4, Marjun Danberg 2, Birita Jacobsen 2 og Eir Berg 2

Málskjúttar VB: Una Nolsøe 5, Tamara Radic 5, Marijana Trbojevic 3, Laila Jespersen 3, Gurið Mortensen 3, Christina Holm 2, Birita H. Olsen 1, Helga Eyðunsdóttir 1 og Rannvá Johannasen 1

Dómarar: Regin Petersen og Ragnar Simonsen

Viðmerkingar

viðmerkingar