Fimti FM-róðurin í summar verður rógvin í Fuglafirði leygardagin. Nakrir bátar er komnir aftrat síðani seinast, og teir eru: 5-mannafarið Silja úr Fuglafirði mannað við dreingjum, Sundabáturin 6-mannafar menn, Drekin og Hvassi 5-mannafør kvinnur og Herningur 6-mannafør kvinnur, og so er Jallurin 5-mannafar gentur ikki á listanum. Tað gerst lættari og lættari at gita seg fram til vinnararnar, tí sjáldan hava vit havt so tryggar vinnarar í so nógvum róðrum sum í summar. Hetta er grein nummar 500 síðani í apríl mánað í fjør.
Fara vit hesuferð fyrst til 10-mannaførini, so tykist Klaksvíkingur vera stinnastur, men tveir rógvarar eru farnir í land, og tveir gamlir kenningar komnir umborð. Ger hetta nakran mun? Havnarbáturin startaði illa á Tvøroyri, tí rokni eg við, at vit fáa ein javnari róður leygardagin, tó við Klaksvikingi sum vinnara. Tvey eru 8-mannaførini, og tað tykist ikki, sum Miðvingur hevur nakað at svara aftur við ímóti Argjabátinum. Argjabáturin vinnur róðurin men ikki so trygt sum á Tvøroyri.
6-mannaførini við kvinnum eru avgjørd framman undan róðurin, tí Jarnbardur fær onga kapping í summar. Nú er Herningur við aftur, og tí er kapping um annað plássið, sum óivað Herningur fer avstað við. 6-mannaførini við monnum eru altið spennandi, og sagt verður, at Martin Venned hevur verið umborð á Sølmundi og fingið skil á ymiskum, og hetta gav so ein sigur á Tvøroyri. Kemur nýggjur vinnari, so verður tað antin Gongurólvur ella Jarnbardur, sum vinnur róðurin. Eg giti Gongurólv hesuferð, tí Gongurólvur hevur vunnið bæði Sølmund og Jarnbard, men ikki enn í summar vunnið sær fyrsta plássið?
5-mannaførini við kvinnum eru hesuferð sjey bátar, tí Drekin og Hvassi eru eisini við. Havfrúgvin tykist at vera best fyri, men so er tað Teistin, sum róði ótrúliga væl á Tvøroyri. Kann Teistin fáa góðan start og ikki altíð missa so nógv fyrsta hálva teinin, so trúgvi uppá, at Teistin kann vinna róðurin. Eg giti Teistin vinnur í harðari kapping við Havfrúnna.
Erla Kongsdóttir og hinir bátarnir 5-mannafør við gentum. Bara er áhuguvert at fylgja við, hvør bátur vinnur silvurmerkini. Sum eg skilji, hevur Sílið mist rógvara vegna skaða, og Jallurin, sum varð nummar tvey á Tvøroyri, er ikki á startlistanum. Blikur vinnur sær tí annað plássið. 5-mannaførini við dreingjum fingu løgna lagnu á Tvøroyri, tí Fípan Fagra misti nøglina. Drekin rør væl, og tað ger Royndin Fríða eisini. Jallurin sýnist ikki at hava funnið rætta stevið í summar, tí giti eg enn einaferð Drekan at vinna róðurin. So er kapping millum Royndina Fríðu, Fipuna Føgru og Jallin um annað plássið. Eg giti, at Fipan Fagra vinnur silvurmerkini.
Fuglafjørður er góð róðrarvág, og tey í Fuglafirði duga væl at avgreiða róðrarnar. Sjálvt um kenna nøvnini á mest sum øllum vinnarunum, so er altíð áhugavert og spennandi at fylgja róðrunum. Slett ikki dámar mær navnið Master, sum eisini rógva úm føroyameistaraheitið í Fuglafirði. Bara Skálabáturin er við í Fuglafirði, meðan fýra eru bátarnir við kvinnum. Mítt boð til Róðrarsambandið er, at vit ikki siga masters, men Skálabáturin menn eldri og tildømis Rádni kvinnur eldri.(Vagnur)
