Sørvágur er frálíkt róðrarøki eisini til longu teinarnar. (Mynd Vagnur)
Klokkan er tíggju leygarmorgun, og nógv er á skránni í dag. Ein sonur skal giftast klokkan 14.00, veitsla í kvøld klokkan 18.30, men so er eisini kappróður í Sørvági. Báðar myndirnar tók eg í 2007, tá eg skrivaði grein um kappróðurin í Sørvági, sum hevði torført at fóta sær, sjálvt um kappróður í Sørvági hevur djúpar røtur. Tað er flogbóltur, sum í ítrótti setur Sørvág á Føroyakortið ikki kappróður. Afturvendandi spurningurin er, tá illa gongst í hond, um rætt er, at hava so nógv róðrarøki í Føroyum. Jú, tað er rætt, haldi eg, men so mugu “hørð” krøv setast til fyrireikingina.
Myndina tók eg í 2007. (Mynd Vagnur)
Politikkurin hjá Róðrarsambandinum hevur altíð verið, at FM-róðrarnir skulu spaðast út á so nógv pláss í Føroyum sum einaferð møguligt. Og hetta er góður politikkur. Tí skiftast tildømis Sandavágur, Miðvágur og Sørvágur um vestanstevnuróðurin, og at vit fyri ikki so nógvum árum síðani fingu sjeynda FM-róðurin. Sørvágurin er gott róðrarøkið, men minnini frá nøkrum árum síðani í Sørvági spøkja aftur. Tað fer ikki at henda í dag, tí veðrið er gott, og fólk bæði í Róðrarsambandinum og í Sørvági hava lært av hendingini. Tá var eisini av ringastu róðrarlíkindum, og róðrarnir skuldu verið avlýstir henda dagin.
Ikki fái eg hugt at øllum róðrunum í dag beinleiðis, men spentur sjálvandi. Tá eg skrivaði og gitti í vikuni, at Ormurin fór at taka Eysturoying í Sørvági, vóru menn á Eysturoyingi og Orminum skjótir at svara aftur á in.fo, at Eysturoyingur ætlaði sær at vinna allar róðrarnar í summar, og at Ormurin fór at vinna í hvørfall ein róður. Alt hetta ger kappróður spennandi. Eri spentur at fáa at vita, hvør dreingjabáturin vinnur í Sørvági, tí bátarnir eru javnir. 10-mannaførini eru altíð spennandi, og so havi eg áhuga í barnaróðrinum, har vit uttan iva fáa nýggjan vinnara. Í øllum hinum róðrunum vænti eg ikki tær stóru broytingarnar. Góða vestanstevnu og góðar róðrar øll somul. (Vagnur)