Drekin reyði vann allar róðrarnar í summar. (Mynd Hvannrók)
Samanumtikið gekk væl at avgreiða allar FM-róðrarnar í summar, sjálvt um ikki byrjaði nóg væl á norðoyastevnu, har róðurin byrjaði hálvan tíma ov seint. Fara vit fyrst til kappingarreglur og lógir, so vóru tvær hendingar í róðrarárinum, sum vit áttu at sloppið undan. Sjálvandi skuldi verið skotið av, tá Gongurólvur hekk fastur í startinum á sundalagsstevnu. Málið endaði í ÍSF-dómstólinum, sum aftur førdi til, at RSF strikaði 6-mannafarsróðurin. Síðani hendingin við dómarabátinum, sum gav 6-mannafarinum Lómi aldu á vestanstevnu. RSF gav Lómi viðhald í klagu, og tí umróður eitt mánakvøld í Miðvági. Síðani til tey ítróttaligu avrikini.
Myndin av Erlu kongsdóttir á norðoyastevnu boðaði ikki frá spennandi kapping. (Mynd Hvannrók)
Tað sást tíðuliga á norðoyastevnu, at summar manningar høvdu fyrireikað seg betur til róðrarárið enn aðrar manningar. Á norðoyastevnu fingu vit fyrstu ábendingarnar. 5-mannaførini við dreingjum Fípan Fagra og Blikur vóru í serflokki alt róðrarárið. Fípan Fagra vann fimm róðrar og gjørdist føroyameistari, og Blikur vann tveir róðrar. Aldursmunurin spælir inn í dreingjaróðrinum, tí so stórur munur á bátunum. 6-mannaførini við kvinnum vóru bara trý á norðoyastevnu, og manningin umborð á Jarnbardi var nógv betri fyri enn tær umborð á Sølmundi og Lómi. Heili 21 sekund var millum Jarnbard og Sølmund. Á ólavsøku var bara eitt sekund millum somu bátar. Sig so tað.
8-mannafarsróðrarnir vóru allir spennandi í summar. (Mynd Hvannrók)
Erla kongsdóttir 5-mannafar kvinnur legði hart út á norðoyastevnu og ábendingin var, at báturin fekk onga mótstøðu restina av árinum. Hevði roknað við Havfúnni, men manningin kom ongantíð veruliga fyri seg í róðrarárinum. Tó broyttist nakað, tá royndir rógvarar mannaðu Sílið, sum endaði við at geva Erlu kongsdóttir veruliga kapping á ólavsøku. 6-mannaførini við kvinnum og 5-mannaførini við kvinnum er alt ov fá, og tá summar manningar koma trilvandi inn í róðrarárið við ov lítlari venjing, so gerst munurin ov stórur og slett eingin kapping.
Við kappróðrareygum er syrgiligt at síggja slíka mynd frá norðoyastevnu. Hvar er tildømis Sølmundur? (Mynd Hvannrók)
6-mannafarsróðurin við monnum var spennandi og áhugaverdur alt róðrarárið. Bátarnir vóru javnir frammi í oddinum, men so spilti Páll fangi spælið. Fýra ymsir bátar vunnu teir seks róðrarnar. Hvessingur vann tveir róðrar, Páll Fangi tveir róðrar, Jarnbardur ein róður, Tvørabáturin ein róður, og róðurin á sundalagsstevnu varð strikaður. Stuttligt og áhugavert at síggja 6-mannaførini í summar. 8-mannafarsróðurin var spennandi á øllum sjey stevnunum. Kvívíkingur byrjað at vinna tríggjar FM-sigrar, men so kom enn meira spenningur í róðrarnar, tí Knørrur vann á jóansøku, Kvívíkingur á fjarðastevnu, Miðvingur á vestanstevnu og Knørrur á ólavsøku.
Fípan fagra og Blikur dreingir høvdu mangan dystin harðan frammi í oddinum. (Mynd Hvannrók)
5-mannaførini Fípan fagra og Drekin gentur kappaðust um fyrsta plássið fyrstu tríggjar stevnunar, men so vann Silja úr Fuglafirði tríggjar róðrar á rað, so javnt var í stigum fyri ólavsøkuróðurin millum Silju og Drekan. Men á ólavsøku hendi so tað, at Firvaldur av Tvøroyri, sum er barnamanning og harvið gestarógvari, vann róðurin. Silja og Drekin formáddu sær einki á ólavsøku. Silja vann FM-heitið, tí hon var fremri enn Drekin. Frammi í oddinum alt róðrarárið vóru serliga Fípan Fagra, Drekin, Silja og Jallurin.
Hvessingur 6-mannafar menn vann FM-heitið. (Mynd Hvannrók)
10-mannafarsróðurin er søga fyri seg. Spennandi fyrsta FM-róður í Klaksvík, har Drekin reyði vann við Klaksvíkingi nummar tvey. Alt talaði fyri spennandi kapping serliga millum Drekan reyða og Klaksvíking. Men so løgdu teir Klaksvíking og heldur mannaðu 6-mannafarið Páll fanga, har teir vunnu tveir róðrar. Síðani kom alt hóvastákið um Klaksvíking á ólavsøku, sum øll kenna. Tað er mín vón, at vit ongantíð aftur uppliva slíkan sjónleik í føroyskum kappróðri, tí hetta líkist svartasta ongum. Sjónleikurin úr Klaksvík órógvaði 10-mannafarsróðurin og 6-mannafarsróðurin. So er tað sagt, sjálvt um Klaksvíkingur gav Drekanum reyða kapping á ólavsøku.
Firvaldur vinnur óvæntað genturóðurin á ólavsøku. (Mynd Hvannrók)
Var tað nú so “smart” at lata øll 10-mannaførini rógva í sama róðri á ólavsøku. Vøkur sjón men ótrúliga stórur munur, tá hugsað veður um, at vit rógva bara 901,25 metrar á ólavsøku. Hetta boðar eisini frá, at eldri menn, menn í ringari venjing og gestarógvarar hava ongan møguleika ímóti vælvandum rógvarum, sum fyrireika seg væl til róðrarárið. 1000 metrar á øllum stevnum í 2014 var eitt royndarár, og árið 2015 rógva allar FM-manningar eisini 1000 metrar. Takk fyri í ár øll somul. (Vagnur)