Her síggja vit stóru fjarhitarørini verða løgd í lendið. (Mynd Vagnur)
Í morgun spákaði eg mær í Gundadal til tess at vita, hvussu gongst at gera nýggja áskoðaraskýlið á Tórsvølli. Jú, har vóru arbeiðsmenn, lyftir og gravmaskinur, og nú leggja teir seinastu hond á áskoðaraskýlið eystureftir. Tak er komið yvir áskoðaraplássini eystureftir og suðureftir.Tórsvøllur er um at fáa altjóða skap.
Nú er nýggja skýlið um at gerast liðugt. (Mynd Vagnur)
Annað stórt arbeiði fer eisini fram á økinum, tí nýggja húsið hjá Fótbótlssambandinum og hallirnir har á leiðini skulu hava fjarhita. Stór bjálvað rør verða løgd í lendið. Fjarhitin fer at koma frá fyribils hitastøð, sum er gjørd skamt frá. Men alt skal seinni bindast í høvuðsleidningin, sum Fjarhitafelalagið skal leggja í Sundsvegin. Tey siga, at høvuðsleidingurin er komin oman til Berjabrekku við Mylnuna. Alt um fjarhita í Gundadali er komið í rættlag, tí nýggja bygningurin hjá BankNordik skal hava fjarhita.
Nýggja húsið hjá Fótbóltssambandinum er stórt. Í fyrstu hædd er millum annað matstova, og tú sært skúlastólar og skúlaborð í næstu hædd, har fótbóltsskúlin skal halda til. Eini hálvhundrað skúlanæmingar í 8. og 9. flokki hava valt fótbólt á tímaskemaði, og næmingar koma bæði úr Norðsteymoy, Vágum og Eysturoy til Havnar at venja fótbólt og ganga í skúla. Tá Føroyar spæla næsta A-landsdyst á heimavølli, eru nýggja áskoðaraskýlið liðugt. (Vagnur)