Róðrarfelagið Knørrur fer at byggja stásiligt nútíðar neyst í Álakeri

Allan Mouritsen er formaður í Róðrarfelagnum Knørri, og her stendur hann á grundøkinum í Álakeri, har nýggja neystið skal standa. Spennandi ætlan, og neystið kemur at hava góðan drátt oman á sjógv.. (Mynd Vagnur)

Tá tú herfyri sást Allan Mouritsen formann í Róðrarfelagnum Knørri siga, at felagið ætlar at byggja nýtt neyst í Álakeri, gjørdist tú forvitin. Kenni alla søguna um felagið, og Allan er fjórði formaður í róðrarfelagnum, tú samskiftir við um grein um róðarumstøður hjá  Róðrarfelagnum Knørri. Felagið hevur síðani á sumri 2010 húsast í friðaðum neysti ”Evensens pakkhús” við Müllers brúgv. Gott pláss til bátar, men eingir aðrir hentleikar sum skiftingarrúm, brúsur, vs-ir og venjingarrúm.

– Vit ynskja at savna alt virksemið hjá felagnum á einum stað, og nú bátahavn skal gerast í Álakeri, gerst eisini møguleiki hjá okkum at byggja nýtt neyst. Ætlanin er ung, og allar tekningar eru ikki lidnar, og fíggingin ikki enn komin á pláss. Neystið verður 630 fermetrar í tveimum hæddum og kanska eisini við lofti, sigur Allan.

Frálíkt pláss til bátarnar í Evensens pakkhúsi, men eingir aðrir hentleikar, kappróðrarfelag skal hava. (Mynd Vagnur)

Søgan um Róðrarfelagið Knørr er áhugaverd, og skulu vit aftur til árið 1978, tá nakrir postmenn fóru at tosa um, at stuttligt hevði verið at mannað kappróðrarbát. Sigurd Andreasen segði mær í grein, at 8-mannafarið Leirvíkingur stóð í neysti í Leirvík og hevði ongan góðan. Teir lándu bátin til Havnar og róðu fyrstu ferð við bátinum í 1979.

Leirvíkingur var gulur, og so at mála bátin bláan og at mála kenda postmerkið við horninum av júst yvirtikna Postverkinum á bátin. Slíkt er ikki loyvt longur. Í 1980 vann Postbáturin á ólavsøku, og teir róðu seinastu ferð við Postbátinum í 1982. Báturin stóð í nøkur ár, men so kom báturin at eita Knørrur, og Róðrarfelagið Knørrur var stovnað 28. februar 1985. Leirvíksingur/ Postbáturin/Knørrur er til enn og stendur í bygningi í Rituvík.

Fyrstu árini helt Róðrarfelagið Knørrur í friðaðum neysti við “Lágikai”, har bara pláss eru fyri tveimum bátum. (Mynd Vagnur)

Róðrarfelagið Knørrur kom at halda til í eisini friðaðum neysti við ”Láikai” við Rættará. Har var pláss fyri tveimum bátum. Fyrst 8-mannafarið Knørrur, men so smíðaði Hanus Jensen bátasmiður úr Skúvoy felagnum 6-mannfarið Jarnbard. Síðani vaks bátatalið við fyrst Jallinum og øðrum bátum, so felagið eigur nú tíggju kappróðrarbátar.

Felagið hevur í nógv ár hildið til í friðaðum bygningi við Müllers brúgv, og tey hava roynt í fleiri umførum at sleppa at savna alt virksemið í bygninginum, men landið eigur bygningin, sum er friðaður. Nú eru tey í Róðrarfelagnum Knørri komin har til, at her skal brótast upp úr nýggjum og ikki bíða eftir friðaða bygninginum. Og formaðurin Allan Mouritsen sigur:

Tey í róðrarfelagnum trívast væl á Müllers brúgv, men landið eigur friðaða pakkhúsið. Tá nýggj bátahavn verður gjørd í Álakeri, fær Róðrarfelagið Knørru gott grundøkið til neyst. Nú ætla tey at bróta upp um armar og byggja nýtt neyst, sigur Allan.  (Mynd Vagnur)

– Ja, nú herja vit á at fáa felagnum nútíðar kappróðrarneyst í Álakeri. Vit hava brúk fyri 630 fermetrum at byggja á, og vit eru í samráðingum við Tórshavnar kommunu um økið. Ætlanin er so mikið nýggj, at tekningarnar eru ikki enn lidnar, og hvat neystið fer at kosta.

– Vit ynskja at savna alt virksemið á sama stað, tí vit havi jú ikki havt brúsur, vs og hava vant innandura í Tollbúðini á Eystur bryggju. Bátur stendur eisini neystinum við “Lágikai”, so vit mangla rætt og slætt pláss til alt virksemið hjá felagnum, sigur Allan at enda.

Spennandi at fylgja gongdini í Álakeri, nú arbeiðið er byrjað at byggja bátahavnina. Eisini spennandi at fylgja, hvussu fer at gangast Róðrarfelagnum Knørri at byggja nýtt neyst. Felagið hevur fingið góð úrslit seinnu árini, sjálvt um umstøðurnar ikki hava verið nøktandi. Á ólavsøku vann tildømis bæði 10-mannafarið Ormurin, 8-mannafarið Knørrur og 6-mannafarið (Vagnur)

Viðmerkingar

viðmerkingar

Leave a reply