Blikur av Argjum við gentum var einasti nýggi vinnarin á sundalagsstevnu

Spennandi róður millum Erlu Kongsdóttir og Sílið við kvinnum í endaspurtinum. (Mynd Hvannrók)

Sum ítróttaskrivari og eygleiðari var eg alt ikki væl nøgdur við avrikið í Kollafirði. Í allar fagrasta róðrarlíkindi, eydnaðist ikki at avgreiða róðrarnar til tíðina. Eftir róðurin við 6-mannaførunum við kvinnum vóru upplýstar nýggjar tíðir. Gentubátarnir skuldu annars til startin klokkan 14.50, men ikki fyrr enn hálva tíma seinni klokkan 15.20 komu bátarnir til startin. Hetta er ikki nóg gott. Bryndis Maria Jóhonnudóttir tók myndirnar fyri Hvannrok.fo. 

Hvør orsøkin er, er líkamikið, tí tankarnir eru allar fyrst hjá rógvaranum, sum skulu fyrireika seg til róðurin millum annað hita upp. Ja, so eru tað áskoðararnir á bryggjuni og kring landið. Hetta er bara ikki nóg gott.

Skilji ikki rættiliga, hví man setir tíðir á róðrarnar, tá man í allar bestu róðrarlíkindum ikki megnar at halda tíðirnar. Hetta hendi eisini fleiri ferðir seinasta ár. Tá tað er sagt, gekk væl at starta bátarnar. Frásøgnin góð og myndirnar góðar í Kringvarpinum, men tað gongur framvegis ikki væl at benda bátanøvnini. Báturin eitur Klaksvíkingur og ikki Klaksvíkingurin og Falkur og ikki Falkurin.

RSF skal leggja alla orku í at halda ásettu tíðirnar. Hetta hava serliga rógvararnir uppiborið. (Mynd Hvannrók)

Men so til róðrarnar. Fara vit fyrst til gentubátarnar, so vóru tað ikki teir fremstu bátarnir, og teir, sum fóru við heiðursmerkjunum, sum fingið besta startin, tí Falkur, Báran og Beinta dógu beinanvegin frá. Men longri inni um 300 metrar var fatastiskt at síggja Blik, Tambar og Drekan eina løtu togast stavn um stavn.

Tambar vann á norðoyastevnu, men nú fór Blikur við sigrinum og Drekin bleiv nummar trý. Skal leggja aftrat, at drekagenturnar róðu í fjør barnaróður umborð á Ingibjørg, so tær eru heilt vist væl nøgdar við bronsumerkini. Tú kanst rógva genturóður sum 15,16, 17 og 18 ár.

Spennandi endaspurtur í genturóðrinum, har tær umborð á Bliki megnaðu at knógva Tambar. Drekin nummar trý og Beinta nummar fýra. (Mynd Hvannrók)
Her mynd av gentubátunum úr øðrum vinkli. Nærmast Drekin, síðani Blikur, Tambar, Beinta, Báran, Falkur og Sílið. (Mynd Hvannrók)

Uttan at taka nakað frá sigursvandu kvinnunum umborð á Sølmundi, so var stóra upplivilsi at síggja kvinnurnar umborð á Smyrli úr Vági. Tær vunnu sær hálvan sigur í Kollafirði, tí tær blivur nummar trý í Klaksvík, og í Kollafirði nummar tvey.

Fara vit til fjarstøðuna hjá Smyrli fram til Sølmund, so minkaði munurin fram til Sølmund frá ellivu sekundum á norðoyastevnu niður í seks sekund í Kollafirði.Tær rógva ómetaliga væl, og meira áhaldndi umborð á Smyrli, so kunnu tær geva Sølmundi veruliga kapping.

Sølmundur vinnur tryggan sigur, men fjarstøðan aftur til Smyril er minkaður. (Mynd Hvannrók)
Her síggja vit Lóm av Argjum. (Mynd Hvannrók)

Í dreingjaróðrinum leyp Jallurin avstað og var hálva bátslongd á odda tíðliga í róðrinum, men so komu báðir hvítu bátarnir við drekastevnunum. Tað sýntist, sum longu mergjaðu tøkini umborð á Drekanum munaði í hvørjum taki, tá hann stakk drekastevnið fram um Jallin.

Men so hendi eisini, at Sílið í dag ikki megnaði at fylgja við, tí í endaspurtinum tók Royndin Fríða í góðum endaspurti Sílið. Altíð áhugavert at síggja dreingjaróðrarnar, og við HR brillum beit eg merki í, at Ingibjørg við dreingjum vann sær fimta plássið. Teir róðu barnaróður í fjør.

Jallurin fekk nógv besta startin, men drekadreingirnir vóru ógvuliga stinnir og vunnu róðurin. (Mynd Hvannrók)
Hørð kapping um triðja plássið, sum Royndin Friða vann. Nærmast Royndin Fríða síðani Sílið, Drekin og Tjaldrið. (Mynd Hvannrók)

Fragd at síggja ungu garparnar umborð á Páll Fanga í góðari venjing. Nú kenni eg menninar umborð á Gongurólvi, sum ikki eru í nóg góðari venjing, men teir ætlaðu at leggja hart út í Kollafirði, og so var gjørt. Annars eru teir royndir rógvarar

6-mannafarsróðurin eru prógv um, at tú kanst ikki bjóða av heilt frammi í oddinum, uttan tú ert í topp venjing. Havi stóra virðing fyri ungu monnunum umborð á Páll Fanga, sum rógva væl. Eri heilt vísir í, at megnar tildømis teir umborð á Gongurólvi og Gullbrandi at koma í betri venjing, sum minkar munur heilt vist fram til Páll Fanga.

Ungu menninir umborð á Páll Fanga vunnu aftur tryggan sigur, men Gongurólvur beit veruliga frá sær og bleiv nummar tvey. (Mynd Hvannók)

Áhugavert at síggja Argjabátin og Árnfirðing so leingi rógva mest sum stavn um stavn, og at bara endaspurturin var munurin. Tá hevði Argjabáturin nakað meira orku. Ørvur megnaði ikki at fylgja við.

Árnfirðingr og Argjabáturin lógu leingi stavn um stavn, men Argjabáturin hevði betri endaspurt. (Mynd Hvannrók)
Ørvur megnar ikki rættiliga at fylgja við. (Mynd Hvannrók)

Spennandi at bíða eftir, hvussu fór at gangast frammi í oddinum við 5-mannaførunum við kvinnum. Erla Kongsdóttir vann á norðoyastevnu, og Sílið gjørdist nummar tvey. Men Erla Kongsdóttir og Sílið lógu tá so langt burtur  hvør frá øðrum. Og fór Jallurin kanska at gera um seg í Kollafirði. Fyrsti róðurin var skotin av, tí bátur hekk eftir,  og í seinna róðrinum reyk Jallurin av stað og legði trygt á odda. Men á hálvari leið løgdu Erla Kongsdóttir og Sílið seg á odda, og góða løtu var Sílið fremst. Jallurin megnaði ikki at fylgja við, og Erla Kongsdóttir vann endaspurdin. Spennandi at fylgja næstu róðrunum.

5-mannafør við kvinnum. Eina løtu var Sílið fremst. (Mynd Hvannrók)

Ikki nógv orð um 10-mannafarsróðurin, tí Ormurin er higartil betri á øllum mótum enn Klaksvíkingur og Suðuroyingur, sum ávikavist gjørdust nummar tvey og trý. Einki talar fyri, at Ormurin verður tikin í summar. (Vagnur) 

Teir umborð á Orminum sýnast at vera óvanliga væl fyri og neyvan tikin í summar. (Mynd Hvannrók)
Her síggja vit nærmast Klaksvíking, Ormin, Suðuroying og Havnarbátin. (Mynd Hvannrók)

Barnaróður við dreingjum

1 Fiskurin 02.47.35

2 Heykur 02.48.03

3 Ingibjørg 02.48.22

4 Fípan Fagra 02.48.42

5 Ternan 02.51.47

6 Svalan 02.53.06

7 Pílur 02.58.10

8 Spógvin 03.02.22

9 Knúkur 03.07.36

Myndatól mítt kom ov seint til Kollafjarðar, tí ongar myndir av barnaróðrinum við gentum, sum Firvaldur vann. Her síggja vit Fiskin úr Vági fara fyrstur um málið. Síðani Heykur, Ingibjørg, Fípan Fagra, Ternan og Svalan. (Mynd Hvannrók)

 

Barnaróður við gentum

1 Firvaldur 02.51.09

2 Ørnin 02.59.06

3 Frúgvin 03.01.05

4 Ingibjørg 03.05.31

5 Knúkur 03.06.28

6 Hulda 03.09.10

7 Tambar 03.13.40

8 Havørnin 03.13.42 

5-mannfør við gentum

1 Blikur 05.35.25

2 Tambar 05.36.02

3 Drekin 05.36.44

4 Beinta 05.40.03

5 Báran 05.44.06

6 Frúgvin 05.44.42

7 Falkur 05.47.14

8 Sílið 05.53.07

9 Kollur 05.56.39

10 Knúkur 06.05.21

11 Fenja 06.06.02

12 Royndin Fríða 06.07.39

13 Stubbin 06.24.35 

6-mannfør við kvinnum

1 Sølmundur 05.07.21

2 Smyril 05.13.01

3 Páll Fangi 05.15.48

4 Lómur 05.30.36 

5-mannfør við dreingjum

1 Drekin 05.24.45

2 Jallurin 05.26.39

3 Royndin Fríða 05.29.12

4 Sílið 05.30.13

5 Ingibjørg 05.36.37

6 Tjaldrið 05.42.27

7 Silja 05.43.47

8 Heykur 05.46.01

9 Ørnin 05.52.42

6-mannafør við monnum

1 Páll Fangi 05.06.14

2 Gongurólvur 05.09.32

3 Rádni 05.12.01

4 Lómur 05.17.45

5 Sølmundur 05.34.42

8-mannafør

1 Argjabáturin 04.55.15

2 Árnfirðingur 04.56.25

3 Ørvur 05.09.30

5-mannfør við kvinnum

1.Erla Kongsdóttir 05.30.47

2 Sílið 05.32.00

3 Jallurin 05.37.05

4 Teistin 05.43.21

5 Blikur 05.58.17 

10-mannfør

1 Ormurin Langi 04.39.01

2 Klaksvíkingur 04.41.11

3 Suðuroyingur 04.43.01

4 Drekin Reyði 04.47.17

5 Havnarbáturin 04.51.21

 

 

 

 

 

Viðmerkingar

viðmerkingar

Leave a reply