Tað var og er altíð stoltleiki og æra at vinna Útvarpssteypið, sum ikki kann vinnast til ognar. Løgmaður handar altíð steypið á ólavsøku. Hyggja vit eitt sindur aftur í róðrarsøguna, so var í 1964 fyrstu ferð kappast um FM-heitið. Ein FM-róður var fyriskipaður eftir ólavsøku, og henda skipanin helt fram, til núverandi skipan fór av bakkastokki í 1973. Men longu fyrst í 60 árunum høvdu fólk FM-tankar, og Útvarp Føroya slóðaði fyri í 1962 og gav eitt vakurt silvursteyp at kappast um. Nú komu fyrstu ferð stig í føroyskan kappróður. Bert ein bátur kann vinna Útvarpssteypið, og steypið kann ikki vinnast til ognar. Og tað var nakað serligt at vinna Útvarpssteypið, tí løgmaður handaði steypið á ólavsøku. Kappingarreglurnar fyri Útvarpssteypið eru hesar:
§ 1 Útvarp Føroya hevur í 1962 latið ferðasteyp til kappróðurin á ólavsøku. Steypið kann ikki vinnast til ognar, men verður á ólavsøku handa eftir hesum reglum.
§ 2 Treytin fyri at luttaka í kappingini er, at báturin rør á øllum stevnunum. Bátarnir, sum lúka hesar treytir fáa stig. 3 stig fyri vunnan róður, 2 stig fyri annaðplássið og 1 stig fyri triðja plássið. Og hetta er galdandi á øllum stevnunum. Tann báturin, sum hevur flestu stigini eftir ólavsøkuróðurin, fær handað steypið. Stendur á jøvnum millum tveir ella fleiri bátar, so ger nevnd av, hvør rør vakrast á ólavsøku. Um nevndin ikki sær seg føran fyri hesum, so fer fram lutakast.
§ 3 Útvarpið setir eina trýmannanevnd at standa fyri kappingini og er avgerð hennara endalig.
Í 2002 vóru so nógv nøvn ritað í Ùtvarpssteypið, at pláss var ikki fyri fleiri nøvnum, og tí útvegaði Útvarpið nýtt steyp, sum sjálvandi eisini eitur Útvarpssteypið/Kringvarpssteypið. Í 2012 skrivaði eg grein um Útvarpssteypið og fann fram til allar manningarnar, sum høvdu vunnið steypið. Tað ætlaði eg eisini nú, men tað tók sína tíð at fáa seinastu nøvnini á listan niðanfyri, men góðari hjálp kom alt á pláss. So er tað Kolturssteypið, sum Niclas í Koltri bátasmiður lat til vakrasta róður á ólavsøku. (Vagnur)
Hesir bátar vunnið Útvarpssteypið. Sílið er báturin, sum hevur vunnið steypið oftast.
1962 Ørvur – 1963 Tjaldrið – 1964 Sølmundur – 1965 Norðoyingur – 1966 Fípan Fagra – 1967 Fípan Fagra – 1968 Sílið – 1969 Kvívíkingur – 1970 Skálabáturin – 1971 Skálabáturin – 1972 Víkabáturin – 1973 Sílið – 1974 eingin vinnari – 1975 Havnarbáturin – 1976 Kollfirðingur – 1977 Oyndri – 1978 Hvessingur – 1979 Kvívíkingur – 1980 Sílið – 1981 Kvíkvíkingur – 1982 Gongurólvur – 1983 Smiril – 1984 Vestmenningur – 1985 Nólsoyingurin – 1986 Ørvur – 1987 Ørvur – 1988 Miðvingur – 1989 Nólsoyingurin – 1990 Sølmundur – 1991 Jarnbardur – 1992 Sílið – 1993 Skálabáturin – 1994 Argjabáturin – 1995 Argjabáturin – 1996 Sílið – 1997 Drekin – 1998 Eysturoyingur 1999 Jarnbardur – 2000 Frúgvin – 2001 Havnarbáturin – 2002 Sílið – 2003 Ørvur – 2004 Jarnbardur – 2005 Nevið Reyða – 2006 Ørnin – 2007 Jarnbardur – 2008 Sílið – 2009 Argjabáturin – 2010 Páll Fangi – 2011 Klaksvíkingur – 2012 Miðvingur – 2013 Erla Kongsdóttir – 2014 Drekin Reyði – 2015 Rádni – 2016 Fivaldur